Kynnoh ka MPTA ba lum pisa beaiñ ka kynhun u Wanshai Kharshandi na ki kali kit syiar

Shillong, Rymphang 11: Ka Meghalaya Poultry Suppliers and Meat Eaters Association (MPTA) ha ka sngi baar ka la buh ka jingkylli ïa u Wanshai Kharshandi bad ki briew jong u halor ka jingkynnoh ba ki la pynlong ïa ka jingkhmih, talasi ïa ki kot ki sla bad ki syrnot halor ka koit ka khiah ïa ki kali kiba kit ïa ki syiar kiba ju wanrah sha Meghalaya.
“Mano ba la ai bor ïa u Bah Kharshandi bad laingut ki briew jong u ban talasi ïa ki syrnot ka koit ka khiah jong ki kali kiba kit ïa ki syiar kiba wanrah sha Meghalaya,” kynnoh u Bah Everest Mylliem Umlong president ka MPTA.
U Bah Umlong u la kynnoh ba ka Association ka don ki sakhi satar ba u Bah Wanshai u la lum bad shim ka pisa na ki kali kiba kit ïa syiar sha Meghalaya ha ka kyrteng jong kiwei pat ki seng.
U la ïathuh ba halor kane, ka Association ka la dep phah ruh ka jingujor hapoh Byrnihat Police Outpost ha ka 27 tarik u bnai Kyllalyngkot.
“Ka Association ka la dawa ruh na ka tnat Animal Husbandry and Veterinary ka sorkar Meghalaya ban pynshitom ïa u Kharshandi bad ryngkat lang ki paralok jong u. Kumjuh ruh ngi la dawa na ka tnat ba kan wanrah ïa ki rukom treikam na ka bynta ban wanrah ne shalan ïa ki syiar sha kane ka jylla,” u la bynrap.
U Bah Umlong u la ong ba ka Association kham mynshwa ka la ïohpdiang ki jingtip ba ka la don ka jinglum pisa beaiñ ha Byrnihat hynrei ha ka por ba la poi ha kane ka jaka kito kiba donkti ban lum ïa ka pisa ki la phet noh na kane ka jaka.
“Ha ka sien kaba ar halor kane ka kam lum pisa beaiñ, ka Association ryngkatlang bad ki nongkhaiï ngi leit bran bran sha kane jaka bad ngi la leit ruh ban buh ka jingujor ha Byrnihat Police Station bad ka jingtohkit halor kane kam kaba ngi la ujor ka la dang ïaid shakhmat,” u la bynrap.