Ka soskular hapdeng ka NPP bad ka BJP ka long tang kumno ban pynroi pynpar ïaka jylla

By Mawphor Editor On Feb 12, 2025

Shillong, Rymphang 11 : U President ka NPP ha ka jylla uba dei ruh u Symbud Myntri Rangbah u bah Prestone Tynsong u la ong mynta ka Sngi Ba Ar, ka soskular hapdeng ka NPP bad ka sorkar NDA ba la lamkhmat da ka BJP ha ka sorkar pdeng ka dei tang halor ki kam pynroi pynpar ïa ka jylla lait nangta ym don jingïadei da kumwei pat.
Haba kren ha ka jingïalang paidbah ha Umsning ban pan jingkyrshan na ki paidbah ïa ka kyrtong MDC jongka NPP ka kong Macdalyn S Mawlong u bah Prestone u la ong “ Ka roi ka par ïa ka jylla ka dei soskular bad ka sorkar NDA ym ïa kiwei kiwei”
U la kyntu ïa ki paidbah ba kim dei ban shah ïalam bakla ha kita ki jingkynnoh ba ka NPP ka dei ka BJP namar u la ong hadien ba la shimti ïa ka jingsynshar ha u 2018 da ka sorkar MDA ba la ialam da ka NPP kawei na ki mat ba hakhmat eh ka long ban shakri hok ïa ki paidbah ka jylla da kaba kyntiew ïa ka roi ka par bad ka ïoh ka kot.
“ Hadien ba ka sorkar NDA ka la ïoh knieh noh ïa ka jingsynshar ha Delhi na ka Congress ka NPP hapoh ka jingïalam u National President bad Myntri Rangbah ka jylla u Conrad K Sangma ki la rai ban pynïajan bad pynïadei bad ka sorkar NDA hynrei ym dei kumba kynnoh Bhai-Bhai. Ngi la leh ïa kane na ka bynta ban ïoh jingïarap bad jingpynroi pynpar ha ka jylla bad dei ruh na kane ka daw ba ka jylla ka la ïoh ïa shibun ki projek pynroi pynpar na ka sorkar pdeng bad ka dei tang kane ka kam ba la ïatrei lang bad ka sorkar NDA ym ïa kiwei kiwei pat” ong u bah Prestone.
U la ong ba kine ki projek ki long kiba donkam haduh katta katta naka bynta ka roi ka par jong ka jylla bad jingïoh myntoi jong ki paid nongshong shnong. “ Phi lah ban mutdur ba dang shen ngi la buh ïa u maw nongrim ban trei noh ïa ka Secretariat ba thymmai ha New Shillong ban pynkylluid ïa kane ka nongbah Shillong ba mynta. Ka jingmang na ka bynta kane ka projek ka long haduh 1200 klur tyngka bad shen yn sa sdang noh ïa ka kam” ong u Symbud Myntri Rangbah da kaba ther ruh ïa ki Liang Pyrshah bad ong “ Ngam tharai ba kin pyrkhat ne pohsniew ban pynkynriah ïa ka Secretariat na kane ka nongbah Shillong sha katei ka nongbah Shillong kaba thymmai mynta la 40-50 snem.
U pynthikna ruh ba kane ka Secretariat ba thymmai kan long ka dak sah kynmaw ha ka histori jongka jylla bad ki paid nongshong jongka. “ Kumta nga kyntu ïa ki paidbah khamtam ïa ki samla ba kim dei ban shah ïalam bakla da ki jingkynnoh bym don nongrim khlem da bishar ïa ki kam ba bha ba la leh da ka NPP. Dei ruh ha kane ka sorkar baïalam ka NPP ba ïa ki projek ba sahteng kum ka Crowborough ba la tip mynta kum ka Vivanta Taj la lah ban pyndep bad kumjuh ruh ïa ka 5 Star Hotel Marriot. Ngi la lah ruh ban tei ïa ka IT Centre ha Mawdiangdiang bad ïa ka Lariti Centre kawei na ki centre kaba heh tam ha kane ka thaiñ shatei lam mihngi ka ri India. ïa kine baroh la leh na ka bynta ban myntoi ki paidbah”
“ Kumta ngi hap ban ïatrei lang bad ki briew kiba nabar ka jylla khamtam mynta lei lei ba ngi thmu ban dang tei shuh shuh bun tylli ki Five Star Hotel bad kawei yn sa sdang noh shen ha Ri Bhoi khnang ba ki samla na ka District kiba la dep ïa ka Hotel Management kin ïoh kam ha katei ka hotel” ong u Symbud Myntri Rangbah
U la ong ruh ba kane ka sorkar ka la pyrshang lut ki lad ki lynti ban pynïoh kam ïoh jam ïa ki samla lada ym dei eh da ki kam sorkar hynrei da kiwei kiwei ki kam ba kin ïeng ha la ki jong ki kjat. “ ïa kine la leh wat hapdeng ki jingshah ther maw kiba jur hynrei ngan ïai ong ïa phi iai bteng ban ther maw namar ngim salia ngin ïaid beit shakhmat namar katba phi dang ther maw katta dang ïoh ki jingkyrkhu na ka bynta ki paidbah bad ka jylla hi baroh kawei. Nga kyntu ïa ki paidbah ba kin ïai buh ïa ka Party ha ki jingduwai khnang ba kan lah ban dang wanrah ki jingkylla kiba khraw na ka bynta ka jingmyntoi bad jingïoh nong ki paidbah hi.
Haba kyrpad ïa ki paidbah ka Umsning ban ai ka jingkyrshan ba pura ïa I kong Macdalyn Sawkmie u President ka NPP u la ong ruh “ Phi long kiba donbok tam namar ka Ri Bhoi ka dei kata ka District kaba nang ïai kiew bad kiba bun ki projek kin dang treikam ha kane ka district tangba ngam pat lah ban ïathuh namar lada nga ïathuh phin sa ong ba wan pynbiej ïa ki paidbah. Hynrei nga kyntu ïa ki samla ka District ban trei shitom ha ka liang ka pule puthi namar ka kam ka la ap lypa nangne shakhmat”. U la ïathuh ruh ïa ka jingïoh jingmyntoi jong ki paidbah na ka Western Bypass namar tang ka bai jaka puta la siew haduh 620 klur sha ki trai jaka ban sdang ïa kane ka projek. Ka long ruh kumjuh palat 5000 klur la siew bai jaka puta na ka bynta ka Express National High Way naduh Umiam shaduh Malidor bad Silchar. Namar kane ka projek ruh ka shongdor 25000 klur tyngka bad na katei 18000 klur tyngka yn pynlut tang hapoh Meghalaya. Mynta ka sorjamin ka la ïaid bad ngi kyrpad ïa ki shnong ki thaw,ki Rangbah Shnong bad ki trai jaka puta ban ïatrei lang khnang ba kane ka kam kan ïaid sted shakhmat.