Nongpoh, Rymphang 05: Ki ar tylli ki Karkhana ha ka thaiñ Byrnihat ki la hap ban siew ïa ka kuna sha ka sorkar lyngba ka Meghalaya State Pollution Control Board (MSPCB), kaba dei halor ka jingpynkheiñ na ka daw ka jingpynmih palat ïa ki lyer jaboh na kitei ki Karkhana, kaba la ktah ïa ka mariang bad ïa ki paidbah nongshong shnong ka thaiñ Byrnihat.
Kum ban pynkynmaw, ka Meghalaya State Pollution Control Board, ha ka sngi baar jong ka taiew, ki la khang khyrdep haduh 6 tylli ki Karkhana bad napdeng kitei ki 6 tylli ki Karkhana, ki ar tylli ki Karkhana ba ba kynthup ïa ka Shyam Century Ferro Alloys Private Limited kaba hap siew T. 4 lak ka kuna bad ka Khasi Alloys Private Limited, ka hap ban siew T. 2 lak ka kuna, na ka daw ka jingpynkheiñ ha kaba pynmih tdem jaboh sha ka mariang.
Ïa kane ka jingdaiñ kuna ïa kitei ki Karhana ba pynkheiñ la pyntip da u Bah YF Laloo, Environmental Engineer ka MSPCB, uba la pyntip sha ki lad pathai khubor, kaba dei hadien ka jingjurip hynnin ka miet ïa ki Karhana ha ka thaiñ Byrnihat, kaba 6 tylli ki la khang khyrdep mynsngi bad ha ka por mynmiet ruh ki la leit jurip kynsan biang ïa ki Karkhana ha 13mer, na ka bynta ban tehlakam ïa ki Karkhana ba pynkheiñ aiñ.
