Shillong, Rymphang 05: Ka Nongthymmai SC ka la pynthut jur ïa ka jingkheiñ jingdiah jong ka Shillong Lajong FC namar ka jingïakhun jong ki ha ka OC Blue Shillong Premier League 2024 ha madan First Ground – SSA Stadium, Polo, ka la kut noh ha ka jingïakhaid da mar 1-1 kol hynne ka sngi Balang.
U Rimankhraw Kharumnuid (69’) u la lah ban pynlamkhmat ïa ka Lajong shuwa ba ka Nongthymmai kan wanphai ban pynïakhaid noh lyngba u Donboklang Majaw (83’). Ka kol kaba bud ka dei ruh ka kol kaba 200 jong ka lympung mynta ka samoi.
Kane ka resol kamut ba mynta ka Lajong ka la shah tam da 2 poiñ ha ka lahduh ba bat ïa ka burom – ka Mawlai SC (26 poiñ la 28 poiñ), nalor kata ka Mawlai ka dang sah sa kawei ka jingïalehkai ha kti, ba kan sa ïakhun mynta ka sngi ha kaba ka don jingkyrmen ruh ban pynjlan ïa ka jingïoh lamkhmat haduh 5 poiñ bad pynskhem ïalade ha ka kyrdan ba nyngkong ha ka OC Blue SPL.
Ka Nongthymmai ka dang ïaineh ha ka thup ki kynhun ban shah pynhiar kyrdan (relegation zone) – ka la ïoh mynta 8 poiñ – hynrei ka jinglehkai kaba shlur pyrshah ïa ka Lajong ka lah ban ai mynsiem shibun ïa ki nongialehkai. Kane ka la pynkut ruh ïa ka jingshah rem kaba hynriew sien lynter jong ka kynhun.
Haba phai sha ka jingïakhun, lah ban kdew ba ka SLFC ka la ïoh shibun ki kabu ksiar ban pynkhihjar ha ka kylla step hynrei kim shym la lah ban pynurlong ïa ki.
Ka mynsiem ïakhun ka la sdang ban pjah noh ha ka kylla miet, katba ha kawei ka liang, ka Nongthymmai ka la sdang ban thaw ïa ki lad ki lynti watla ka long kaba jwat ïa ka ban pynpra ïa ki rangapdien jong ka Lajong, khamtam namar ba don katto katne ngut ki rangïalehkai jong ka kiba la shitom shuwa ban kut ka kylla step.
Hadien nangta, ka bol pashat na u Samchaphrang Lato ha ka liang kadiang ka la rung hapoh phyllaw kol bad ki rangïalehkai ka Nongthymmai kim shym la ïoh ban tehlakam, kaba ailad ïa u Rimankhraw ban shim ïa ka kabu bad pynkhih ïa ka kol kaba nyngkong na bynta ka kynhun.
Hynrei kane ka jingkmen kam shym la neh slem, naba ka Nongthymmai ka la lah ban pynïakhaid lyngba u Donboklang ha ka 83 minit.
Kane ka la pynlong ïa ka Lajong ba kan thaw lad biang kumno ban ïoh lamkhmat hynrei kam shym la lah satia. Ha ki khyllipmat shuwa ban kut ka por la sakhi ruh ïa ar tylli ki bol pashat kiba shyrkhei hynrei ka Nongthymmai’ ka la lah ban tehlakam pat lyngba u Dlessing Lyngdoh bad u Akash Thapa (rangapkol).
Kin don ar tylli ki jingïalehkai jong ka OC Blue SPL mynta ka sngi. Kaba nyngkong kan long hapdeng ka Langsning FC bad ka Mawlai ha ka por 11 baje mynstep bud sa ka Sawmer SC pyrshah ïa ka Rangdajied United FC ha ka por 2 shiteng mynsngi.
