Dei ban burom ïa ka rai ki shnong ba kwah pynlong tang ïa ka Common Platform: Bah Diengdoh
Shillong, Rymphang 04: U Commissioner & Secretary ba khmih ïa ka tnat District Council Affairs u Bah Cyril Diengdoh ha ka sngi baar u la ong ba ka rai jong ki shnong ban pynlong ïa ka common platform na ka bynta ban ïalap ïa ka elekshon da ki political party bad kumjuh ruh ki kyrtong ban ïakhun elekshon dei ban burom.
Haba kren sha ki lad pathai khubor u Bah Diengdoh u la ong ba kum kine ki jingïalang ki dei ban ïaid lang katkum ki jingbthah hapoh ka model code of conduct (MCC) na ka bynta ki seng saiñ pyrthei bad kumjuh ruh ki kyrtong na ka bynta ka elekshon sha Autonomous District Councils (ADCs) bad ïa kine ki jingbthah la dep ruh ban sam sha baroh ki political party na ka bynta ba kin pynlong ïa ki jingïalang paidbah, ki rally ne procession, ha kaba kane ka donkam ka jingai jingbit na ki deputy commissioner ne sub-divisional officer.
U la ong ruh ba ki don katto katne ki dorbar shnong kiba la rai ban pynlong ïa ka common platform.
“Ïa ki la shah ban pynlong ïa ka common platform naba ha ka common platform, ki ai ka lad kaba ïaryngkat sha baroh ki political party kaba kynthup ruh ïa ki kyrtong shimet ba ki wan sha ka common platform bad ban pynlong ïa ka jingïalang paidbah. Ym lah ban khang ïa kano kano ka political party ne ki kyrtong ba kin pynlong ïa ka jingïalang paidbah bad kumjuh ruh ka common platform. Na ka bynta kane, haoid lada ka don ka jingshim rai jong kano kano ka shnong ngin hap ban burom bad ki lah ruh ban ïaid shakhmat,” ong u Bah Diengdoh.
“Ka jingujor kaba la ïohpdiang dangshen ka la long ba ki don ki shnong ba kim ailad ïa ki katto katne ki seng saiñ pyrthei ba kin pynlong ïa ki jingïalang bad kumta ngi la bthah ïa ki DC ban ïakren bad ki nongïalam shnong ha kaba la ong ba na ka bynta ka bha ka miat jong baroh dei ban ai lad ïa baroh ba kin pynlong ïa ka jingïalang ïalap elekshon. Lada ki la rai ban pynlong tang ïa ka common platform lah ban pdiang ïa kane, bad lada ki la rai ban ym pynlong ïa ka common platform ïa kane ruh dei ban burom,” u la bynrap.