Shillong, Rymphang 03: Ka Langsning FC ka la hap ban ïakhun shitom ban pynliem ïa ka Ryntih FC da 2-1 kol ha ka jingïakhun jong ki ha ka OC Blue Shillong Premier League 2024 ba la long ha madan First Ground – SSA Stadium, Polo, hynne ka sngi Nyngkong.
Dei lyngba u Dauruhipaia Pale (35’) ba ka Langsning ka la ïoh ban lamkhmat shuwa ba u Basuklang Bina (69’) un pynïakhaid na bynta ka Ryntih. Hadien nangta u Dajiedlang Wanshnong (87’) u la pynkhih ïa ka kol kaba kongsan ban pynjop shuwa ban kut ka por.
Lah ban kdew ba ka Ryntih ka la mad ïa jingeh kaba khraw ha baroh ka samoi bad khamtam eh ha kine ki jingïalehkai ba dang shen, ha kaba ka la shah thep haduh 24 kol bad ïoh pynkhihjar tang shi sien naki lai tylli ki jingïalehkai ba ladep. Ha kawei pat ka liang, ka Langsning, ki la hiar ha la ka jong ki jingïalehkai haba sdang jong ka OC Blue SPL 2024 hynrei ki la lah ban lehkai kham bha hadien. Kane ka lah ban pynlong ïa ki ban kheiñ sting khyndiat ïa ka Ryntih hynrei ka liang pyrshah kim don jingmut ban pynsuk ïa ki.
Ka jingwan phai biang jong u Luckystar Lawai kum u nongap kol ba pura ka la ïarap ban pyllait ïa u Derick Khongsit, u rangïalehkai ba shabar uba la long u nongap kol ba ïeng ha ki ar tylli ki jingïalehkai ba khatduh jong ka Ryntih, ban shim ïa ka bynta kaba u ju ïalehkai.
Wat la katta ruh, u Luckystar u khlem shym la lah ban leh eiei ban khanglad ïa ka jingpyrshang jong u Dauruhipaia kaba ula thep da kaba pyndei tiak da ka khlieh ïa ka bol pashat ba la wan na liang kamon.
Ar minit hadien, watla u Basuklang u la ïoh ïa ka kabu ba paka hynrei ka jingpyrshang jong u la shah khanglad noh ha u Rajat Paul Lyngdoh rangapkol ka Langsning.
Ka Ryntih ka la durut ban ïoh ïa ka kol pynïakhaid ha kaba u Andy Mawthoh u la ïoh ruh ïa ka kabu ksiar hapoh phyllaw kol hynrei ka jingpyrshang jong u ka la shu pynsmiej ïa u crossbar. Ha kaba khatduh, u Basuklang, uba la paw kum uwei na ki rangïalehkai ba kynsai jong ka Ryntih ha kane ka samoi ba jwat, u la lah ban pynkhih ïa ka jar lyngba ka bol pashat na ka corner. Bad kane ka dei ruh ka kol kaba ar ïa u na bynta ka klob na ki hynriew sien ïalehkai.
Kane ka kol pynïakhaid ka la pynkyndit ïa ka Langsning ba kan ïakhun tyngeh bad dei lyngba u rangïalehkai bujli u Dajiedlang uba la thep ïa ka kol pynjop.
Hynrei na ka liang jong ka Ryntih, ki dang pyrkhat beit ba ki dang lah ban wanphai ryngkat ka poiñ na kane ka jingïalehkai bad ki la jan ruh sa shisien ban pynïakhaid ha ka por shuwa ban kut na ka jingpyrshang jong u Leversharp Syiemlieh hynrei la shah khanglad noh ha u Rajat Paul.
Kane ka namjop ka la kyntiew ïa ka Langsning sha ka kyrdan ba 4 ha ka miej da kaba kamai 17 poiñ hynrei ki la ïalehkai kham bun sien (13 sien ïalehkai) ban ïa kiwei pat ki kynhun ha kane ka lympung. Katba ka Ryntih, watla ka la lah ban ïalehkai kham bha hynne ka sngi, hynrei ka la mad biang ïa ka namrem kaba 11 sien lynter bad ka dang ïaineh sha trai duh jong ka miej da tang 3 poiñ.
Ka jingïakhun mynta ka sngi kan long hapdeng ka Nongrim Hills SC pyrshah ïa ka Laitkor SC ha ka por 2 shiteng mynsngi. Ka Laitkor mynta ka don ha ka kyrdan ba saw da kaba kamai 16 poiñ, katba ka Nongrim Hills ha ka kyrdan ba hynñiew da 13 poiñ.
