Nongstoiñ, Rymphang, 02: Hynnin ka step sngi Saitjaiñ katto katne ki riew paidbah, kiba ïaid lynti ha kawei ka surok kaba marjan bad ka ophis District Sport Officer ha Nongstoiñ, kaba dei ruh ban leit sha khlieh ïew Nongstoiñ, ki la ïohi ïa kawei ka met ïap jong I khunlung ba dang shu kha.
Ki tyllong khubor ba la ïoh lum na ki paidbah la ong ba ki la don ba ïohi ïa kawei ka plastik ba la patar ki ksew. Ynda ki la leit beh ïa ki ksew ban peit ki la ïohi pynban ïa ka met I khunlung ba dang shu kha I ba la khlad.
Shuh shuh la ong ba ki paidbah hadien kane ki la pyntip noh mar mar sha ki pulit ka Nongstoiñ Police Station, ha kaba ki pulit ruh ki la wan ban shim ïa katei ka met ïap I khunlung bad leh ruh kiba donkam katkum ka aiñ.
Haduh ba la pynmih ïa kane ka khubor ym shym pat pat la ïoh satia ka jingtip kaba bniah halor katei ka jingjia.
