Ban tehlakam ïa ka jingrung beaiñ ki bar jylla donkam ban pynkhlaiñ ïa ki nongsynshar shnong

(Tesar Marweiñ)
Nongstoiñ, Rymphang 01: Ka jingrung beaiñ jong ki bar jylla hapoh kane ka jylla, ka nang jur katba nangmih ki sngi bad ym lah ban len ïa ka jingshisha, namar lajan man la ka por ki sengbhalang ki hap ban leit khynra la ka dei ha ki jait karkhana kiba dei ki jaka trei kiba neh slem ne ha ki jaka ba ki kontaktor ki pyntrei ïa ki jingtrei kiba lah ban pyndep tang hapoh shisnem ne tam, kum ki surok kiba ka mang pisa ka long da ki spah klur bad kiba la hap ban pyntrei da ki Kompeni kiba heh kiba la don lypa da ki spah ngut ki nongtrei kata naduh kiba peit ïa ka Engineering wing, mechanical wing, labour wing bad kiwei kiwei hynrei ki nongpynïad jong ki Kompeni kim pynbiang satia ïa ki jingdonkam kiba.
Kumba ki sengbhalang ki ju lap haba ki leit khynra ka dei ka jingbym shimkhia jong ki nongpynïaid jong ki Kompeni. Haba phai ha ka jingbun jong ki bar jylla ki bym biang ki kot ki sla kum ki labour licence, work permit bad kiwei kiwei ki jingdonkam, ka daw kaba kongsan eh ka dei namar ba ha kane ka jylla ym shym pat la pyntrei kam satia ïa ka Inner Line Permit. Nalor kata na ka liang ka sorkar ruh kam shym la buh kino kino ki kyndon ba pyrkhing ban teh lakam ïa ka jingrung kyrthep ki bar jylla.
Haba phai pat ha ka jingïoh rung lait lan jong ki bar jylla ban trei bad ki Kompeni ne ki kontraktor, la lap ba ki nongsynshar shnong kim ju pan jingkheiñ na ki nongpynïaid jong ki Kompeni ne ki Kontraktor, ba katno ngut ki nongtrei ki dei ban wan rah haba ki pyntrei ïa kino kino ki jingtrei ha ki jaka kiba hap hapoh u pud u sam jong ki shnong ki thaw jong ki, hynrei tang namar ba la wan ki kam pynroi ki sngew ba ka la biang.
Ha ka jingshisha ki nongsynshar shnong haba ki ïoh jingtip ba ki kam pynroi na ka sorkar ki wan ha ki shnong ki thaw, ki la dei ban wad jingtip bniah ba ki ban pyntrei ïa kitei ki kam ki dei ki Kompeni ne ki Kontarktor. Shuwa ba kin sdang ban pyntrei ruh ki dei ban da pan jingtip ba katno kan shim por haduh ba kin da pyndep, namar katkum ki tender paper ba ka sorkar ka la allot sha ki ka la buh thik pa thik ïa ka por ban pyndep.
Nalor kata ki la dei ban shim jingkheiñ ruh ïa ki nongtrei, shuwa ba kin wan bad ki la dei ban kren da kaba shai sha ki kontraktor ne ki nongpynïaid, ba ki dei ban pynbiang shuwa ïa baroh ki jingdon kam na ka bynta ki nongtrei. Katba kim pat lah ban pynbiang kim pat dei ban sdang ban pyntrei ïa kano kano ka projek.
Lada ki nongsynshar jong baroh ki shnong hapoh ka jylla kin ïaid da kata ka lynti, ka jing wan rung kyrthep ki bar jylla kan duna bha bad ka don ruh ka lad ban pynïoh kam bylla ïa ki trai jylla bad ki nongshong shnong. Lait noh ïa ki kam kiba ki trai shnong bad ki trai jylla kim lah ban trei te lada ki wanrah da ki bar jylla ruh ka lah ban long, tangba ki hap ban pynbiang shuwa ïa ki jingdon kam baroh katkum ba ki dei ban leh.