Nongstoiñ, Rymphang 01: Ka jingkiew sted jong ka jingstad saïan teknoloji ha kine ki sngi ka la long ka jingkyrkhu kaba khraw ïa ka jingtrei kam trei jam, ka thoh ka tar, ka jingïoh jingtip kloi ïa ki jingjia ha shityllup ka pyrthei ym tang da kaba shu thoh hynrei lah ban ïohi da ki khmat ruh.
Ha kawei pat ka liang ka kylla long pat ka jingtim bad ka jingma kaba khraw ïa ki bym nang ban pyndonkam. Kawei pat kaba ki paitbah kim pat sngewthuh haduh kine ki sngi ka dei ka mih ki online platform, da kaba pynpoi ïa ki tiar ki tar bad ki jingdon kam haduh ki tyngkong ïing kum ïa ki jaiñ ki nep, ki tiar ïing tiar sem bad wat haduh ka bam ruh ym don jingeh shuh ïa kiba don pisa ban shu shong haïing, namar lada ki shu leh da ka online ki jait jingbam kin ïoh lut katba ki kwah bad wat ïa ki dawai da shin ruh.
Ha kaba ïadei bad ka khaïi ka pateng bad ki ïew ki hat la ïoh ban ïakren bad u bah A.Lyngdoh, uwei na ki nongkhaïi na ki thaiñ Mawshynrut ha kaba u la ong, ba jinghiar arsut ki ïew ki hat ha kine ki lai snem tam mynta ka la long shaba palat. Ki nongwan ïew wan hat ki la duna haduh katta katta, ki nongkhaïi kiba shong dukan tang ha ki sngi ïew kim sngew myntoi shuh, khamtam kito kiba shong ha ki dukan shu shim wai namar ka bai wai ka rem ki mar ki mata pat ki sahkut.
U la ong ruh ba ha kine ki sngi kiba don ïa ki dukan ba kham heh lei lei ki la shu phah wan buh ïa ki trai ki tar bad wat ïa ka pisa ruh kim don kam shu ban da leit siew mar kti hynrei tang lyngba ki mobile phone ki la lap ban pynpoi thik thik ïa ka pisa sha ki Marwari.
Utei u rangbah u la ong ruh ba ka ym tang da kaba online hynrei ha kine ki sngi ki kharkaïa ne Marwari, ki la buh ruh da ki nongtrei kiba biang ba kin leit rung haman la ki shnong ki thaw ban tyrwa ïa ki mar ki mata, ki tiar ki tar ban pynpoi shaduh ki tyngkong ïing ha man la ki shnong.
Shuh shuh u la ong ba kumba ka long mynta ka jingïabeh jong ki paitbah nongshong shnong ha kane jylla, ban thied ïa ki mar ki mata ki tiar ki tar da kaba shu online, ka pynkiew sted ïa ka ïoh ka kot jong kiwei ki jaitbynriew. Katba ïa ki mar ba ki nongshong shnong kane ka jylla ki pynmih haduh mynta, ym pat don ba thied da kaba shu online, da kaba ai nuksa ïa ki nongshet jingbam Khasi kum ki putharo, pumaloi, pusyep, pusaw bad kiwei kiwei kiba dei ki jait jingbam kiba neh kumba katto katne sngi bad lada sumar bha lei lei wat shitaïew ruh kim pat lei lei.
U la bynrap ruh da kaba ong ba lada ki nongshong shnong ka jylla khamtam kiba na West Khasi, South West bad Eastern West Khasi Hills kiba dei ki nongshong shnong kiba nang bha ban shet jingbam tynrai, ki nang ban pyndonkam da ki online platform khlem artatien kin kylla long kiba riewspah bad kiba ka ïoh ka kot ka jong ki kan kiew na ka por sha ka por.
