Nongstoiñ, K’lyngkot, 29: Ka ïew Nongstoiñ ka dei ka ïew kaba heh tam ha West Khasi Hills namar ka dei ruh ka Headquarter jong ka District. Hynrei ha katkum ka jingpynpaw kiba bun ba lang, ka jinglong jingman kam da shngaiñ ha ki por janmiet.
Halor kane u nongthoh khubor u la leit jurip bad la lap ba ha ki bynta pdeng jong katei ka ïew, ki don bun bah ki ïing jah bym shong briew. Nangta sa ki dukan kiba shu khang khyrdep khlem don ba shong ne die jingdie bad la lap ruh ba ki don ki ïing jah ki bym don jingkhang kiba la kylla long kum ki jaka rieh tngen jong ki riew bymman bad ki riew sniew khamtam ha ka por mynmiet. Nalor kata, la lap ruh ba kitei ki bynta pdeng jong ka ïew ki la kylla long pynban ki jaka bret jaboh kiba la ijli ban peit.
Hadien ka jingleit jurip la ïoh ban ïakren bad u bah Dmikstar Lyngdoh Nonglyngkien, u ba dei ruh u president jong ka Synjuk ki Mahajon Ïew Nongstoiñ, ha kaba u la kubur ba ka jingbun ki ïing jah ka long kaba shi sha bad ka jingpynlong jaka bret jaboh ruh ka dei hi kumta. Nalor kata u la ong ruh ba halor ka jingbun ki ïing jah, na ka liang ki Mahajon ki la ïakren bad u Syiem bad ka hima kim shah satia ban pynlong shnong hapoh ka ïew.
Ha kaba ïadei bad ka jingjaboh u Syiem u la buh ïa ki nongtrei, hynrei ka jingbun ki jaboh jabaiñ ka dei ha kito ki jaka ba bun palat ki ïing jah, namar kiba ju shong ju sah ha kitei ki ïing jah ki dei ki riew shim kabu ki ba shu shong thap khlem ka jingtip jong u Syiem bad ki nong shong dukan.
Ha kajuh ka por u la ong ba ki jaboh jabaiñ baroh ki mih na ka jingdon jong ki ïing jah, namar kito ki ba shu shong thap ha kitei ki ïing jah kim don paiñkhana. Hynrei ki la shu shabar pathar katba ki mon. Halor katei ka jingjaboh na ka liang ki Mahajon kiba shong ïew ryngkat ka jingïatrei lang bad u Syiem kin sa leh ïa kaba donkam.
Ha kaba ïadei bad ka jingdon jong ki briew kiba ïashong kynhun kynhun kumba lai, saw ne san ngut ha ki jaka ba kham kyndong, utei u rangbah u la ong ba kiba kum kitei ki briew ki dei kiba ïa dih kyiad bad ki don ruh wat kiba ïadih drok ruh.
Hynrei na ka bynta jong kitei ki briew ka Synjuk ki mahajon, ka ophis u Syiem, Urban Mission bad ki kynhun pahara shnong jong ka Town area, kin ïatreilang da kawei pat ka rukom kumno ban pynsngewthuh ïa ki, ba kin sangeh noh na kitei ki jingmlien ba sniew. Lada kim sngap ïa ka jing pynsngewthuh ki lah ban ïaid da kiwei pat ki lynti ban rat diengkhong ïa baroh.
