Ka Sorkar ka don ka jingthmu ban wanrah ïa ka Skill Development Ecosystem, ong u Conrad

Shillong K’ Lyngkot 29: U Myntri Rangbah ka Jylla Conrad K Sangma ha ka sngi rakhe Republic Day ha Tura u la pyntip ba ka sorkar jylla ka don ïa ka jingthmu ban wanrah ïa ka skill development ecosystem kaba ïaryngkat kyrdan ha ka pyrthei.
“Ka sorkar kan ai jinghikai ïa 1 Lak ngut ki briew na ka bynta ki kam hapoh ka ri bad 10,000 ngut ki briew na ka bynta ki kam shabar ri,” u la ong.
U la pyntip ba palat 50 ngut ki nurse kin sa leit ai jingshakri sha Japan hadien ka jingai jinghikai ïa ka ktien ka thylliej bad ki jingpynkhreh ïa ki kot ki sla.
“Kine ki nurse ki la long ki nongmihkhmat jong ngi ha Japan bad ki la dep ban ïasoh bad ki hospital. Ki la phah pisa ba kot haduh T.1 Lak na ka bynta uwei u briew ha ka shibnai,” u la ong.
Haba iathuh ba ka long kaba kongsan ban pynthikna ba ka jingsengkam lajong (start-ups) ka Meghalaya kin dang lah ban kiew sha ki kyrdan kiba thymmai, u la ong, “Ka sorkar ka la buh thong ban kyntiew ïa ka sap jong ki kumba 1,800 tylli ki MSME ha u snem 2024-25. Ïa kane ka jingthmu la pyntreikam lyngba ki prokram ai jinghikai ïa ki nongpynïaid ba la shna kyrpang hapoh ka skhim Raising and Accelerating MSME Performance (RAMP) scheme.”
Haba batai ba ka prokram PRIME (Promotion & Incubation of Market-driven Enterprises) kan saiñdur ïa ka rukom sdang kam ha ka jylla, u Myntri Rangbah u la ong, “Ka la pynroi ïa palat 322 tylli ki Start-ups, da kaba pynroi sa 75 tylli ha u bnai Risaw 2025. Ka prokram ka la kyrshan ruh ïa ki startup bad ki jaka pule da kaba pynïoh ïa ka pisa ba palat T.28.76 klur haduh mynta.”
U la pyntip shuh shuh ba ka PRIME hub ha Shillong & Tura ki la ai jingmyntoi ïa palat 6,000 ngut ki riew shimet da kaba ai ïa ki nongsengkam ïa ki jaka treikam lang, ka Wi-Fi ba khlem jingsiew, ka jingkyrshan jingtip, ka jingïarap ban ai ram, bad ka jingïasoh bad ki ïew ki hat.
“Sa ar tylli ki PRIME Hub kin dang ban mih thymmai ha Jylla,” bynrap shuh shuh u Myntri Rangbah ka jylla.