Wat pynlong ishu politik ban pynbiej ïaki paidbah, dawa ka FKJGP ban siang rong noh

Nongpoh, Jylliew 12: Ka Federation of Khasi Jaiñtia and Garo People (FKJGP) kala dawa naka sorkar ba ka dei ban siang rong noh ïa u surok naduh Umsning shaduh Sonidan bad kumjuh ruh u surok na Liarbang shaduh Mawlasnai ter ter namar ka jingsyrtok bad ka jingeh kaba ki paidbah ki mad haka leit ka wan namar ka jingsniew palat jong u surok.
Naka liang u Bah Shanlang Diengdoh General Secretary ka FKJGP, RI-Bhoi District u la ther tyngeh ba ka sorkar kam dei ban leh politik ïa utei u surok ban shu pynbiej kai ïaki paidbah namar ba la jan ka elekshon, hynrei ban siang rong noh mardor kumba ka sorkar kala dep ban pynbna dang shen bala dep ban mang haduh 114 klur lyngba ka World Bank, hynrei haduh mynta ym pat I dak eiei ban sdang siang rong ïa utei u surok.
U tei u nongïalam u la ong ruh ba ki paidbah ka thaiñ Mawhati kila syllang eh haka leit ka wan namar ka jingsniew shaba palat jong u surok wat ki kali kila shem jingeh ban leit ban wan, kaba la pynlong ïa kiba bun ki paidbah ban ud ban nam bad pynsngew ruh sha ki dkhot ka seng.
U la ong ruh ba kitei ki 2 tylli ki surok haka thaiñ Mawhati kila dei kiba donkam eh naka bynta ka jingbit jingbiang jong ki paidbah ban pynsuk haka leit ka wan khamtam kiba pang ba shitom ban beh sha ki jaka sumar bad kumjuh ruh ki samla pule, bad namar ka jingsniew palat jong u surok kaba lah ruh ban wanrah ïaki jingjia ba sngewsih namar ba kitei ki surok mynta kila dap satang da ka thliew ka syar.
U la pynpaw ruh ba ka sorkar kala dei ban sdang noh mardor ïa ka jingpyntrei ïa kitei ki surok ha katei ka thaiñ bad kam dei ban sdang tad haduh bala jan ka elekshon ne ban shu pynbiej kai ïaki paidbah, kumba ka thaiñ Mawhati ka sahdien dei namar ka jingbym biang u surok bad ka roi ka par.
Namarkata naka liang ka seng kala kyntu ïaka sorkar ba ka dei ban shimkhia ban pynsted ïa katei ka kam nakabynta ka jingmyntoi bad ka jingkyrkhu ïaki paidbah ha ka thaiñ Mawhati baroh kawei.