Mawkyrwat, Jylliew, 12: U bah Renikton Lyngdoh Tongkhar, u Nongmihkhmat jong ka Mawkyrwat Constituency bad kum Myntri jong ka tnad umbam umdih ka Sorkar jylla ha ka sngi saitjaiñ jong ka taïew ka 11 tarik u Jylliew, 2022 u la ïoh ban hiar jurip ïa ki ar tylli ki jingtei kawei na ki ka dei ka ïing sah ne Girls’ Hostel kaba don ha Mawkyrwat bad ka shlem ai jinghikai ne ka Rilang College ha Mawsaw, South West Khasi Hills District.
U bah Renikton Lyngdoh Tongkhar haba kren ha ki lad pathai khubor hadien ka jingjurip u la pynpaw ka jingsngewkmen ba lyngba kane shna ïa ka ïing sah ne hostel kan sa long ka jingkyrkhu na ka bynta ki samla jong ka dong ka thaiñ khamtam eh ïa ki samla jong ki shnong kiba dei na ki thaiñ ri war ba kin ïoh ban wan sah da ka jingthmu ban ïoh ruh bteng ïa ki jingpule ha ki skul kiba don ha kane ka dong ba kham pdeng bad da kaba ki sah ha kum kine ki jaka kin lait na shibun kiei kiei kiba long ka daw jong ka jingpynpep skul shiteng por.
“Ka jingsah jong ki khun samla jngai na la ki kmie ki kpa ki ïa kynduh bun ki jingeh khamtam eh ki jingpynshoi kiba wanrah ka jingpyndiaw mynsiem ïa ki kmie ki kpa, hynrei lada ki ïoh ka lad ban wan sah ha kine ki jaka ba la pynkhreh khnang ne ki hostel kan long ka jingkyrkhu ïa ki namar kin don la ki nongap nongsumar ne nongpeit nongkhmih”, ong u bah Renik bad ha ki hostel ki khun samla kim lah ban leh katba ki mon hynrei kin hap ban rung ban mih da ka por.
Shuh shuh u la pynkynmaw ruh ba ïa kane ka jingtei ka Girls’ Hostel kaba ha ka jingmang T. 2.50/- klur ka dei na ka projek jong ka tnad Social Welfare (FY 2016-’17) jong ka Jylla Meghalaya kaba la aiti ban pyntrei ha ka ophis jong u District Rural Development Agency (DRDA) bad ba la sdang naduh u bnai Jymmang, 2021.
Ha kaba ïadei bad ka shlem ai jinghikai ne ka College, u bah Renikton u la ong ba kane ka jingtei ïa kane ruh mynta ka la nang ïaid shakhmat bad kyrmen skhem ba ha i por iba lyngkot ynsa lah ban pyndep bad ban ïoh ban pyntreikam noh ha ka por kaba biang khnang ba ki khun samla jong ka dong ka thaiñ shilliang um kin ïoh ban bteng ïa ki jingpule ha ki kyrdan kiba kham hajrong.
“Ïa kane ka jaka pule la pyntrei hi da ka Rilang Co-operative Society kaba ha ka jingmang pisa kaba T. 25/- lak tyngka ei ei kaba mut na ka CM’s Scheme kaba T. 15/- lak bad na ka MLA’s Scheme pat kumba T. 10/- lak” (CMSRDF 2018 – 2019), ong u bah Renik bad ha kaba ïa dei bad ki kam ki jam ïa mynta shipor la hap ban don shwa ka jingïatreilang bad ka Sngap Syiem College, Mawkyrwat ha kaba ki subjek ba ki samla pule kin shim ruh kin don ka jingïadei bad kane ka kolej.
Kane ka jingtei ka long na ka bynta ban ai ka jaka sah ïa ki khun kynthei jong ka dong ka thaiñ kiba don ka jingthmu ban wan pule ha ki skul ne kolej kiba jan bad ka thaiñ Mawkyrwat.
