Shillong, Jylliew 12: Ka Meghalaya ka la mad noh ka nam rem lyngba ka penalty ha ka Kerala ha ka jingïakhun ba khatduh na ka Group B jong ka lympung ïalehkai Khelo India Youth Games 2021. Ka Meghalaya ha ka jingïashut penalty ka la rem noh da 3-1 bad kut syndon ka jingïaid lynti jong ka mynta ka samoi jong katei ka lympung.
Haba phai sha ka jingïalehkai kaba long ha ka sngi Saitjaiñ ha Haryana, ka Meghalaya kaba don ruh ha ka kyrdan ba hakhlieh duh na ka Group B, ka kham lah ban bat bol bad pashat bol ha ka rukom kaba itynnad bha hynrei ka khlem lah pat ban pyndep ha ka liang ka thep kol.
Ka jingïakhun hapdeng kine ki ar tylli ki team ka long kaba ïakhaid bha baroh arliang ki la ïakhun tyngeh ban thep kol hynrei haduh kaba kut ka kylla step ym don ba lah ban ïathep kol. Haba wanphai sha ka kylla miet, ka jingïakhun ka la nang ïathnem ha baroh arliang, naduh ka rukom pashat bad pyllait bol bad khamtam ha ki jingïa-pyrshang thep kol.
Hapdeng ka jingïakhun kaba ïakhaid bad itynnad bha, ka jingïakhun ha baroh ki 90 minit ka la poi noh sha kaba kut ha kaba ïa ka jingïalehkai la rah noh syndon sha ka jingïashut penalty. Dei ha ka jingïashut penalty, ka Meghalaya ka khlem lah ban pynrung na ka jingtbit u rangap kol ka Kerala u Surajith Kumar uba la ïoh ban kyrda ar tylli ki bol ba la shut ki rangïalehkai ka Meghalaya.
Ka Meghalaya ka la khlem lah ruh ban pynrung hadien ba ka bol ka la leit dei noh ïa u dieng kol katba tang kawei ka kol kaba la rung ba la shut da u Babysunday Marngar.
Kum ban kdew hangne ba ka Meghalaya ka jop laisien naduh ba sdang bad ka don ha ka kyrdan ba nyngkong na ka Group B ha kaba ka la hap ban ïakhun pyrshah ïa ka Kerala kaba don hakhlieh duh na ka Grou A ha ka semifinal kaba khatduh bad ka la mad noh ka nam rem bad duh rung sha ka final.
