Ka jingïakhun MDC ha Jirang kan long hapdeng u sitting MLA pyrshah ïa u sitting MDC

Nongpoh, K’Lyngkot 22: Haba kren ha ka jingïalang pdiang burom ïa ki nongkyrshan na kiwei kiwei ki party sha ka seng Congress kaba la long mynta ka sngi ha Jirang, u Bah Victor Ranee u la kynnoh ka party NPP ka la leh donbor shaba palat ha Jirang Constituency lyngba u MLA uba la pyrshang ban batbor lut ïa ki kam ki jam bad wat ki kam jong ka District Council, bad ka jingkynnoh u MLA ka Jirang u Bah Sosthenes Sohtun ba nga phet hi khlem kano kano ka daw ka long ka bym don nongrim.
U la ong ruh ba ka dei ka history ha Jirang Constituency ba u MLA un hap ban mih madan hi ban ïakhun ïa ka elekshon MDC bad mynta ka kynti ka jingïakhun kan long ruh hapdeng u Sitting MLA pyrshah ïa u Sitting MDC.
Kum ban shu pynpaw ba u Bah Victor Ranee u la jop ïa ka elekshon MDC ha u snem 2014 na ka seng Congress na Jirang Constituency hynrei haba pynshai ha katei ka sngi u la ong ba ka daw ba u la mih na ka seng Congress ka dei namar ba don ki jingjia ha katei ka por u Dr Mukul Sangma u dei u myntri rangbah bad ha District Council ha ka jingïalam u CEM bah PN Syiem ba dei ruh u Working President ka party ngi ïadon lang.
Ha u snem 2016 ka la don ka jingpynbna bala pynmih da ka sorkar ban pynduh bor ïa ka iktiar jong ki Rangbah Shnong bad u PN Syiem u la khot ïa ka jingïalang bad la ong ruh ba lada ki Rangbah Shnong ki duh ïa ka bor ka District Council ruh ka la duh bor namar ka District Council ka dei ka bor bahalor ban peit ïa ki shnong ki thaw, kumta ngi hap ban leh eiei ïa kane.
Ha katei ka sngi por la ujor ruh da ka mukotduma hapoh iing bishar Supreme Court hynrei ka iing bishar ka la rai ban nym pynduh bor ïa ki Rangbah Shnong, bad la jop ruh ïa ka mukotduma watla u la don ruh u Rangbah Shnong bala shah kem hadien ba u la ai syrnod.
Ha u snem 2017 ka sorkar ka la pynmih biang iaka hukum ba u MLA um lah ban bat ar tylli ki post ne bam ar maloi ïa ka kam MLA bad MDC, bad ki la don ruh ki MLA kiba la resign bad na ka liang u Bah PN Syiem u la pyneh triang bad la sospon ïa u CEM ha katei ka por shuwa ka elekshon bad kum ki nongbud kim banse ban mih noh na ka party Congress ryngkat u bah PN Syiem shuwa ban kut u snem 2018.
Bad ha katei ka por la seng biang ïa kawei ka party kaba thymmai kaba la tip kum ka PDF, ban ailad ïa u CEM bala shah sospon ban ïaleh na kane ka seng kaba thymmai, bad kane ka dei ka jingjia kaba baroh ki paidbah ki tip namar ym dei ba ngi phet jyndet na ka party Congress hynrei la pynbor ïangi ban phet noh na katei ka party.
U la ïathuh ruh ba hadien katei ka jingjia na ka liang u MLA ka Jirang u Bah Sosthenes Sohtun u la khot ban ïatreilang baroh 2 ngut ha ka seng NPP bad naduh katei ka por ka jingsynshar ha Jirang constituency ka la pher bak lybak, ka khaii ka pateng ka hiar arsut, bad ka jingsynshar ka NPP ka dei ka jingsynshar donbor.
U la kynnoh ruh ba sha ka thaiñ GS Road jong ka Jirang Constituency u don u MLA u ba batbor lut ïa baroh ki kam ki jam bad wat ki kam jong ka District Council, bad sha ka thaiñ Patharkhmah u don sa uwei u MLA u ngam lah ban jer kyrteng ba u la leh donbor haduh katta katta bad leh donbor wat ïa ka Jirang C&RD Block bad bun na ki shnong ki mad jingeh bad ki ju ong ba ka long shisha kaba eh bha naduh phi don bad ka party NPP bad bun na ki sordar shnong ki rit mynsiem namar u don u 2nd MLA sha ka thaiñ Patharkhmah.
Bad ban rat diengkhong ïa kine ki jingleh donbor kum ki paidbah ngi dei ban tylli mlon bad mynta ka dei ka kabu ksiar ïangi ba u MLA un hap ban ïakhun MDC, ngim dei ban ap ha u snem 2028 hynrei mynta ka kynti namar une u dei u briew ba synshar donbor ha Jirang constituency.
U Victor Ranee u la kynnoh ruh ba u Bah Sosthenes Sohtun u la shet kylla ïa u, hynrei mynta man ka jaka u ong ba u Babu Victor u phet hi khlem kano kano ka daw, bad ngam dei u biej ne myrsiang ban shu mih jyndat na ka sorkar NPP khlem daw.