Shillong, K’Lyngkot 18 : Kum shi bynta ka jingpynkhreh na bynta ka Jingïaseng Samla ba nyngkong eh jong ka Khasi Jaiñtia Presbyterian Synod Pdeng ïa kaba yn pynlong ha ka 28 tarik u Rymphang, 1 tarik bad 2 tarik u Lber mynta u snem 2025 na ka liang u MDC ka thain Bah Lambor Malngiang ryngkat ki ophisar, ki nongïalam shnong kumjuh na ka Balang ha ka 16 tarik mynta u bnai ki la leit ban jurip ia ka surok kaba pynïasoh na Iewpyrsin, Nongkren lyngba ka shnong Nongkyndong shaduh jan Mawpynthih.
Ha kane ka jingjurip ki la sakhi ba ka surok ka la sniew bha bad ka la buh jingeh ïa ki kali ba kin ïaid lyngba katei ka surok.
Kane ka jingjurip ka long shi bynta na ka jingpynkhreh jong ka Balang Presbyterian Nongkrem ban pdiang pynlong ïa ka Jingïaseng Samla ba nyngkong eh jong ka Khasi Jaiñtia Presbyterian Synod Pdeng ïa kaba yn pynlong ha ka 28 tarik u Rymphang, 1 tarik bad 2 tarik u Lber mynta u snem 2025.
Ha shwa ka jingjurip ïa kane ka surok, ki bor pynïaid ka Balang ki la don ka jingïamir jingmut bad u Bah Lambor Malngiang na ka bynta katei ka jingthmu kata ban pynbiang pynbit ïa ki surok bad ki lynti syngkien, ka um, ki jaka ieng kali bad kiwei-kiwei ki jingdonkam na ka bynta katei ka jingïaseng.
Na ka liang u Bah Bhalang Lyngdoh, Tymmen Basan Rangbah ka Balang uba dei ruh u Chairman ka Nongkrem Dorbar Pyllun u la ïathuh ba ka jingdonkam ka long ban pynbiang ïa ka surok namar ki para bangeit kin wan na kylleng ki jaka.
Hadien ka jingjurip ïa katei ka surok, u Bah Donkupar Kharbuli, Rangbah Shnong Nongkyndong u la ïathuh ba ki nongshong shnong ki la angnud ba katei ka surok kan bha noh bad u la kdew ba katei ka surok ka dei kaba donkam bha ha ka ban pynïasoh sha kiwei kiwei-kiwei pat ki bynta.
Kumta, haba kren sha ki lad pathai khubor, u Bah Lambor Malngiang u la ong ba ïa mynta hi ka por ka la khim palat hynrei hap ban moramot ïa katei ka surok na ka bynta ka burom jong baroh lang.
U la ong ba kumba long mynta kam pat don kano kano ka jingpynkhreh mang tyngka hynrei hap ban sei na la pla ban pynbiang ïa katei ka jingdonkam.
