Shimti biang u Bah Lui Lyngdoh kum u President ka FKJGP NKHD, pynskhem u President

0

Nongpoh, K’Lyngkot 18: Hadien ba ka samoi treikam jong ki nongïalam barim ka Federation of Khasi Jaintia and Garo People (FKJGP) North Khasi Hills District kala kut noh, ki nongïalam ka sengkmie mynta ka sngi kila ioh ban pynskhem syndon ia ki nongkitkam ba pura jong ka FKJGP North Khasi Hills District hadien bala dep ban jied thymmai ha ka jingïalang ba shongkun kaba la long mynta ka sngi ha Nongpoh Parish Hall.
Ki nongïalam ba hakhmat jong ka FKJGP North Khasi Hills District bala pynskhem mynta ka sngi ki kynthup ïa u Bah Luistar Lyngdoh kum u President, Bah Lumlang Mawnai Senior Vice President, samla Marshal Diengdoh, Shanlang Diengdoh bad u Comfort Doloi kum ki Vice President, u Ricky Majaw kum u General Secretary, u Samla Artison Khongstid bad u Garbiel Sun kum ki Asst. Secretary, Samla Banroy Wahlang Information Secretary lem bad kiwei kiwei.
Ïa kitei ki nongïalam ba thymmai jong ka FKJGP North Khasi Hills District la wan ban pynskhem da u Bah Dundee Cliff Khongsit President ba rangbah ka FKJGP sengkmie ha ka jingdonlang u Bah Eldie Newton Lyngdoh General Secretary, ki Lyngdoh Raid bad kiwei kiwei ki riew rangbah.
Haba kren ha katei ka sngi ka jingpynskhem ia ki nongïalam ka FKJGP u Bah Dundee C Khongsit u la pynpaw ka jingsngewdiaw ba haki 53 snem ka jingïaid lynti jong ka jylla, hynrei ka jylla jong ngi ka don hapdeng shibun ki jingduna naduh ka pule ka puthi, ka roi ka par bad khamtam ka jingnang shah hiar thma jong ka ki khun samla ha u drok namar ka sorkar kam don satia ia ki polisi treikam ban peit kyrpang ia ki khun samla khamtam ka iohkam iohjam.
U la kyntu ruh ia ki nongïalam ha katei ka sngi, ba kin long ki samla kiba peitngor, ban trei hok ia ka kam kumba la bynshet haki naka bynta ka jingmyntoi jong ki paidbah ym ban shim kabu ha kyrteng jong ka seng maka bynta ka jingmyntoi shimet.

Leave A Reply

Your email address will not be published.