Shillong, K Lyngkot 18: Ka Tnad Information and Broadcasting mynta ka sngi ka la pyllait ïa ka jingpynbna ba la pynkylla ïa ka Cable Television Network Rules, 1994 (the Rules), ban pynïaid ryntih ïa ka kam pynrung kyrteng ki Local Cable Operator (LCO). Kane ka la treikam naduh mynta ka sngi, ka jingpynrung kyrteng ki LCO kan long lyngba ka bor internet bad ka Tnad hi kalong ka bor ba dei khmih ïa ka jingpynrung kyrteng jong ki.
Hadien ba la dep pynthikna ïa ki jingtip shaphang u nongaplai, ba kynthup Aadhaar, PAN, CIN, DIN bad kiwei kiwei, yn ai ïa ki syrnot jingpynrung kyrteng ki LCO ha ka por kaba biang. Kumjuh ruh, ka don ka lad ban kyrpad pyrshah ïa ka jingshah kyntait ka jingpynrung kyrteng lane pynthymmai na ka bynta ka jingkyntiew kyrteng ki LCO.
Mynshuwa, ka kam pynrung kyrteng ïa ki LCO la leh ha ka head post office ha ka thaiñ ha kaba ka office jong ka LCO ka don bad ka Head Postmaster kum ka bor ba dei khmih ïa ka jingkyntiew kyrteng jong ki. Ka kam pynrung kyrteng da kaba leit dalade ka long kaba bunkam bad kaba shim por. Kumjuh ruh, ka jaka pyntreikam hadien ba ladep ka jingkyntiew kyrteng kalong beit thik ha ki katto katne ki jaka.
Ki mat ba kongsan jong ki aiñ ba la pynkylla ha kaba ïadei bad ka jingkyntiew kyrteng ki LCO ki long ki LCO ki lah ban aplai ka jingkyntiew kyrteng ba thymmai lane pynthymmai ïa ka jingkyntiew kyrteng online ha ka Broadcast Seva Portal jong ka Tnad I&B (www.new.broadcastseva.gov.in) bad yn ai ïa ka syrnot jingpynrung kyrteng online. Yn ai jingbit ka jingkyntiew kyrteng ki LCO lane pynthymmai na ka bynta ka samoi san snem, ka jingsiew na ka bynta ka jingkyntiew kyrteng lane pynthymmai ka long tang san hajar tyngka.
Ka jingkyntiew kyrteng ki LCO kan plié lad ban treikam ha baroh u pud u sam jong ka India. Ka jingaplai ban pynthymmai ïa ka jingkyntiew kyrteng kan long kumba 90 sngi shuwa ka jingkut jong ka jingkyntiew kyrteng. Ki LCO ki lah ban buh ka jingkyrpad hakhmat ki bor ba dei khmih kata Under Secretary (DAS) pyrshah ïa ka rai jong ki Bor ba dei khmih , kata u Section Officer ba dei khmih haba shah kyntait ka jingkyntiew kyrteng lane pynthymmai ïa ka jingkyntiew kyrteng hapoh 30 sngi jong ka jingshah kyntait.
Ka jingkyntiew kyrteng ki LCO kan treikam na ka bynta ka samoi ba la kdew ha ka syrnot kyntiew kyrteng. Ha kaba ïadei bad ka jingkyntiew kyrteng ba la dep jong ki LCO kin treikam sa tang 90 sngi, ka jingaplai ban pynthymmai, lada don, lah ban leh mardor ha ka portal.
Ki aplikeshon ba la leh ha ki Post Office na ka bynta ka jingai jingbit/Pynthymmai ïa ka jingkyntiew kyrteng, kiba dang sahteng haduh mynta, kin hap ban weng noh bad hap leh lyngba ka portal.
Lada donkam kano kano ka jingïarap, lah ban phone ha u helpline number ba don ha ka portal lane lah ban phah da ka email sha ka lco.das[at]gov[dot]in .
Ka rukom ban kyntiew kyrteng bad pynthymmai ka ïahab bad ka jingkut jingmut jong ka sorkar ban pynsuk ïa ka kam khaïi pateng, ha kaba yn lah ban ïoh ïa ka syrnot kyntiew kyrteng/ pynthymmai ha ka por kaba biang hadien ba la dep pynthikna online ïa ki jingtip jong kiba aplai.
