Shillong, Jylliew 11 : Ka Asian Development Bank (ADB) ka bei pisa 400 klur tyngka na ka bynta ban pynkhuid bad pynskhem ïa ka Dam Umiam bad halor kane na ka liang u Symbud Myntri Rangbah uba dei peit ïa ka tnad pynmih bording jongka jylla u bah Prestone Tynsong u la lum ïa ka jingïalang ban ïa mir jingmut halor ka Dam Rehabilitation Improvement Project (DRIP).
Ka Dam Umiam ka dei kawei na ki Dam kaba la rim ha ka ri bad ka dei kaba la shah jied ha ka sorkar pdeng ban ïoh ïa kane ka projek DRIP.
La ïathuh ba ka jingpynkhreh ka la ïaid shakhmat ban tei pynskhem ïa ka Dam Umiam. Kane ka dei ka bynta kaba nyngkong jong kane ka projek. Nalor ka Umiam ka don ka jingthmu ban pynbha ïa ka dam Leshka ruh.
Lah ban pynkynmaw ba ka rta jong kane ka dam Umiam ka la hiar sha ka 41 snem namar ka jingdap ktieh palat bad kane ka long kat kum ka jinglap jongka MeECL hi. ïa kane la ïathuh da ki heh ka MeECL hi sha ka Assembly Committee on Environment kaba la khlieh ha kato ka por da i bah S.K Sun MLA ka Mawphlang ba la khlad noh na kane ka pyrthei. Ha ka jingshisha ka rta jongka ka dei ban long 100 snem bad ka dang dei ban kut haduh u 2065 hynrei na ka jingjur ka ktieh ka la hiar noh sha ka 2024.
Lah ruh ban pynkynmaw ba ïa ka jingwad bniah ban lap halor ka jingdap ktieh ka Dam Umiam la leh da ka M/s Water and Power Consultancy Services (WAPCOS) ha u snem 1990 bad ka Tojo Vikas International Private Limited, New Delhi ha u snem ha u snem 2004.
ïa ka Dam Umiam la sdang tei ha ki snem 1960 bad la pyndep ïa ka jingtei ha u snem 1965. Kane ka dam ym tang ba ka pynmih bor ding hynrei ka long ruh kum kawei na ki jaka jngohkai ba khring bha ia ki nongwan jngohkai sha kane ka jylla Meghalaya.
Kumba long ka sorkar ka la hap ban khang ïaid ïa ki kali kiba kit palat ïa ka 10-14 ton namar ba ka rta jongka ka la jan kut bad kane ka long ruh hadien ba la bthah ïa ka sorkar da ka ïing bishar High Court jongka jylla ba ym dei shuh ban shah ïaid ïa ki kali kiba kit palat ïa ka 10 ton.
