Tura, Jylliew, 11: U Deputy Commissioner jong ka West Garo Hills u Swapnil Tembe u la buh hakhmat ïa ka thong ban pynlong ïa ka sor Tura kum ka sor kaba lait na ka jingsatah ki jaboh jabaiñ ha ki lynti ki syngkien kaba pynkhreh ïa ki thong treikam ban pyntreikam pura bad ban pynlong ruh ïa ka District kaba lait na ka jingjaboh da ka jingïatreilang bad ka jingkyrshan jong ki nongshong shnong ka West Garo Hills District.
U Deputy Commissioner u la kyntu ïa manla kawei pa kawei ka longïing ban pynïakhlad ïa ki jaboh kiba mih na ki thliew ing bad na kamra shetja khnang ban dup ïoh pynkylla sha ka sboh bad ha kajuh ka por ula ong ruh ba lyngba kane ka thong yn sa pynlong ruh ïa ka shnong ka thaw kaba ki tin bret ñiut kin long kiba lait na ka jingsma iwtung.
Shuh shuh u la pynshlur ïa baroh ki longing ba ki dei ban pyntreikam ïa ki lai tylli ki jingmut jong u Dak “R” (Reduce, Re-use bad Re-cycle) ha kaba ïadei bad ka jingbret ïa ki jaboh kiba mih na ki thliew ing khnang ban pynduna ïa ki jingkit bakhia jong ka Tura Municipal Board.
Nalor kata, u la ai jingmut ïa manla uwei pat uwei ban rah ïa ki pla jaiñ lane kino kino ki pla kiba lah ban pyndonkam biang haba leit thied leit pet sha iew sha hat khnang ba ki nongdie dukan kin ym pyndonkam shuh ïa ki pla plastik.
U la pynshlur ruh ïa ki longing ba kin kham pyndonkam da ki tiar kiba pynmih na ka thaiñ ha kaba ïadei bad ka jingsong ïa ki mar ki mata khnang ban kyntiew ïa ki nongseng kam lajong na ka thaiñ.
La pyntip ruh ba ki nongtrei ka Municipal kin sa leit shim ïa ki jaboh na manla kawei pa kawei ka thliew iing ha kaba yn sa oh ruh da ka dor.
