Shillong, Jylliew, 11: U Myntri Rangbah ka Jylla u Conrad Kongkal Sangma ha ka sngi Saitjaiñ u la pyntip ba ka Sorkar Jylla ka la mang pisa T. 350 klur khnang ban tei ïa ki jaka ai jingsumar kiba thymmai ha baroh kawei ka Jylla Meghalaya.
Ïa kane u la pyntip haba kren ha ka jingplie buh ïa u mawnongrim ban kyntiew kyrdan ïa ka PHC Tikrikilla, sha ka Community Health Centre ha Kentapara kaba hap hapoh ka Dadenggre Block, West Garo Hills.
U Myntri Rangbah u la pyntip ba ka jingshim rai ban kyntiew kyrdan ïa kane ka jingai jingsumar ka dei ha ka jingleit jngoh jong u ïa kane ka thaiñ hadien ba u la ïohi ïa ki jingduna jong kane ka PHC.
“Ki doktor bad ki nurse jong ngi ki la trei shitom haduh katta katta ban ai ïa ka jingsumar bad ka jingshakri kaba bha tam sha ki paidbah ha ki shnong nongkyndon jong ka jylla wat hapdeng ki jingtynjuh kiba bun,”: u la ong.
U la ong ba ka Sorkar ba mynta ka la trei shitom ban wanrah ïa ki jingkylla ha ka koit ka khiah hapoh ka jylla baroh kawei.
“Da kaba ïohi ïa ki jingeh ba la mad na ka jingwan lynshop jong ka khlam jingpang COVID-19, ki jaka ai jingsumar jong ngi ki donkam shibun ki tiar ai jingsumar na ka daw ka jingbun shaba palat ki nongpang. Ka Sorkar ka la shimkhia ban pynkha ïa ki jaka ai jingsumar, ki PHC, ki CHC khnang ban ïakhun pyrshah ïa kino kino ki jingeh ha ki sngi ki ban sa wan,”u la bynrap.
U Myntri Rangbah u la banjur ruh ba ka roi ka par ka dei ban poi sha ki paidbah kiba im ha ki shnong kiba jngai bad kiba don sha ki bynta ba kyndong eh jong ka jylla.
“Lada phi leit sha kano kano ka jaka phin ïohi ba ki kam pynroi ki don tang ha ki shnong bad ki sor. Ka la dei ka por ban pynkylla noh ïa ka rukom pyrkhat khnang ba ki paidbah kiba ki im sha ki shnong kiba kyndon kin ïoh lem ïa ki jingmyntoi bad ïa ki kam pynroi ba la mang kyrpang na ka bynta jong ki,” u la ong.
U Myntri Rangbah u la kyntu ruh ïa ki paidbah ba kin long pdiang hun ïa ki jingtrei shitom jong ka sorkar khnang ba yn dup lah ban pyntyllun shakhmat ïa ki kam pynroi ha ka jylla.
“Nga ai khublei ïa ki paidbah jong ka Kentapara na ka bynta ka jingai sbun mynsiem ïa ka jaka ban shna ïa ka CHC. Hateng hateng ban ïoh jaka ka long kaba eh haduh katta katta watla ka Sorkar ka kwah eh ban wanrah ïa ki kam pynroi,: u la ong.
Haduh 100 square feet ka jaka la ai ei da ka shnong ban shna ïa ka CHC ha Kentapara.
Ha kane ka sngi, la sakhi lang da u MLA jong ka Tikrikilla u Jimmy D. Sangma, u MLA ka Phulbari u SG Esmatur Mominin bad u Co-chairman jong ka State Planning Board u Limison D. Sangma bad kiwei kiwei.
