Shillong, Jylliew, 11: Ka Khasi Students’ Union (KSU) Central Executive Committee lyngba ka Education Cell ka la ai khublei ïa baroh ki samla pule jong ka Bri u Hynïiewtrep kiba leh bha ha kane ka eksamin SSLC bad HSSLC 2022.
“Ka long kaei kaei kaba sngewtynnad bad ïoh mynsiem ban ïohi ïa kiba bun ki paradoh parasnam ban wan shakhmat ha ka thup jong ki nongwan shakhmat ha ka Top 10 bad Top 20 ha ka SSLC bad HSSLC bad ka seng ka ai khublei kyrpang ïa ki. Kane ka jingjop ka jong phi ka dei hi jingjop ïa ka jaitbynriew bad ka seng ka kitbok kitrwiang ba phin nang ïai kiew ha kiwei pat ki kyrdan,” ong u Vice Chairman ka Education Cell ka KSU-CEC u Samla Shiningstar Kharbihkhiew.
“Ngi sngew ban pynkynmaw ruh ïa la ki paradoh parasnam kiba la ïoh kheit ïa u soh bathiang ha kane ka kynti kaba mynta, ba kane ka dei tang u maw jam uba nyngkong ha ka jingim ka jong ki bad kin dang hap ban trei shitom arshah ban kiew ha kiwei pat ki bynta jong ka jingpule,” la ong ka Seng.
“Na ka bynta kito ki bym shym lah ban kheit ïa u soh uba bha ha kane ka kynti ba mynta, kim dei ban duh jingkyrmen hynrei to dang ïai trei shitom ha ki snem ban wan khnang ba phi ruh phin ïoh pat ïa u soh jong ka jingjop,” la pynkut u kyrwoh na ka Seng.
Ha kawei pat ka liang ka Garo Studet Union (GSU ka ai khublei ïa baroh ki khynnah skul ka jylla khamtam eh ïaki khynnah skul ha ri lum Garo kiba kiba la pass bha ha ka eksamin HSSLC bad SSLC na ka result kaba dang shu mih shen.
“ Ka GSU Exutive Committee ka ai khublei ïa baroh ki khynnah skul ha ka jylla bad khamtam ïa kiba ha ri lum Garo kiba la pass bha ïa ka eksamin HSSLC bad SSLC. Ka Seng ka ai khublei ruh ïa ka tnad pule puthi jongka jylla , ïa baroh ki skul bad college kiba la shim khia ban kyntiew ïa ka jingnang jingstad ha ka jylla. Ngi kyrpad ruh ïa ka sorkar jylla ba kan dang shim khia ban pynbeit ïa ki kynrum kynram kiba don ha ka tnad pule puthi khamtam ïa ki skul bad college ban pynbha ïa ki, ban siew tulop tista ïa ki nonghikai skul bad college khnang ba ka jingnang jingstad kan nang kiew ha ka jylla” ong ka kyrwoh ba la bah da u Zikku Balgra N Marak President ka GSU.
Ka seng ka ai mynsiem ruh ïa kito kiba ym shym la pass ha kane ka kynti ba kin trei shitom bad minot thop ha ki jingpule khnang ba kin pass bha ha u snem ban wan.
