Khliehriat jylliew 11: U General Secretary jong ka Jaiñtia Students Union seng kmie, u bah Treibor R.Suchen haba kren ha ka jingialang pynskhem nongkitkam ha Khliehriat u la ong ba ka seng ka ieng ban dawa na ka sorkar ba ka dei ban phai khmat lem sha kane ka thaiñ East Jaiñtia Hills District, kaba dei ka district kaba ju pynmih buh eh ka khajna ïa ka sorkar bad ïa ka jylla hi baroh kawei, namar kane ka distrik ka la shu shah ieh khun swet ha ka sorkar jylla ha baroh ki liang.
Ka seng ka dawa ruh na ka sorkar ban pynbit pynbiang bha noh ïaka jaka ai jingsumar ka Khliehriat Civil Hospital, ban ai bhah ïa u Artificial Turf kaba ioh na ka Khelo India bad wanrah ïaka District Library bad ka Auditoriun Hall hapoh East Jaiñtia Hills district bad dawa ruh ban wanrah noh ïa ka College Sorkar (Government College) lane ka extension campus jong ka Kiang Niangbah Government College hapoh East Jaiñtia Hills District.
Ka Jaintia Students Union Khliehriat Circle mynta ka sngi ha ka jingialang ka la ioh ruh ban pynskhem ïa ki nongkitkam bad pynrung shuh shuh ruh ïa ki dkhot hapoh ka seng ha kaba la pynbam smai bad pynskhem ïa ki da u President JSU Khliehriat Circle, u bah Livingson Sama.
