Shillong, Jylliew, 11: Ka Khasi Students Union (KSU) Mawlai Mawïong Umjapung Unit ha ka sngi Thohdieng ka la sam da ki shatri sha ki 200 ngut ki khynnah jong ki saw tylli ki skul kiba don ha shnong Mawlai Mawïong Umjapung kiba kynthup ïa ka St.Denis, ka Ai Jingshai, ka Tiewdohmaw bad ka Presbyterian Secondary School.
Ka Principal jong ka Presbyterian Secondary School haba kren ha kane ka jingïalang kaba lyngkot, ka la pynpaw ïa ka jingsngewnguh ba kum ka seng ki Samla pule ka la phaikhmat sha kine ki saw tylli ki skul ha kaba kiba bun ki khynnah kiba pule ha kitei ki skul ki dei kiba wan na ki longïing kiba kham duna ka ïoh ka kot.
ha kajuh ka por ka la ai ïa ka jingkyrkhu kyrdoh ïa ka shnat treikam bad ïa ki dkhot jong ka Seng ba kin nang lah ban trei kham bha shuh shuh na bynta ki paradoh ki parasnam haba ki kynduh ïa kino kino ki jingeh.
U General Secretary jong ka KSU Mawlai Circle u Samla Rapborlang Nongrum uba dei ruh u Asst. Finance Secretary jong ka KSU Sengkmie, u la ïaroh ïa kane ka shnat treikam ba ka la long kaba kloi ban peit lang ïa kum kine ki jingeh kaba ki khynnah skul ki ïa kynduh khamtam ha kum kine ki por ba ladei ka aïom slap.
U la pynpaw ka seng ka ju pynshlur ïa baroh ki shnat treikam kiba hap hapoh ka jingpeit jingkhmih jong ka KSU Mawlai Circle ba ki dei ban mih shakhmat ban leh kino kino ki kam ki ban tei bad ïarap ïa ka imlang ka sahlang bad ong ruh ba ka Seng ka ngeit skhem ba baroh saw tylli ki skul kin pdiang hun ïa ine i jingai barit jong ka Seng na ka bynta ki khynnah skul jong ki.
Ha shwa ban aiti ïa ki shatri, u Kongsan u Samla Pynshai Rani uba dei u Publicity Secretary jong ka KSU Sengkmie, u la kyntu ïa ki khynnah skul ba kin long kiba kohnguh bad kiba shah shkor ïa kaei kaba ki nonghikai ki hikai ïa ki khnang ba ka lawei jong ki kan long kaba phyrnai.
U la ong ba kam myntoi ban don ka spah ka hajar ha ka pyrthei namar ïa ka jingstad bad jingshemphang ka spah kam lah ban thied da leilei.
“Haoid lehse phin lah ban ong ba ki jingai ka KSU ka long kaba rit hynrei lada ki ñiew kor pat kaba rit ruh ka don la ka dor,” u la ong.
U la kyntu ïa ki nongkitkam jong ka Mawiong Umjapung ba kin dang pyrshang shuh shuh ban leh i synei ïa ki khynnah skul bad ïa ki longïing kiba la kynduh jingeh katba ki kot la ka bor.
