Plie ka MCSWA ïa ka prokram ai jinghikai ‘Skills Training’ ïa ki kynthei ha Jowai 

Jowai, Jylliew 11: Ka Mihmyntdu Community Social Welfare Association (MCSWA) ha ryngkat ka jingïatreilang bad ka Directorate of Social Welfare jong ka sorkar jylla hynnin ka sngi 10 tarik, kala plie ïa ka ‘Skill Training Program’ ki rukom ai jinghikai ïa ki kynthei hapoh ka project Empowerment Programme ïa kaba la pynlong ha MCSWA Office Salaroh Jowai.
Ka thong jong kane ka project ka long shi bynta ban pynduna ïa ki nongpang Human immunodeficiency virus (HIV) bad ka Sexually transmitted infections (STIs) kaba lah ban ktah ïa ki kynthei khamtam kito kiba trei ha ki kam awria da kaba ailad ban kin shim noh da kiwei pat ki lad ki lynti kiba ym ktah satia ïa ki khamtam ha ka koit ka khiah.
Na ka liang ka kong R. M. Kharsyntiew kaba dei ka Chief Judicial Magistrate ka West Jaiñtia Hills District haka jingkren kala ai mynsiem ïa kitei ki nongïoh myntoi ba kin shim ïa kane ka kabu bad ban pynleit jingmut ha kitei ki prokram ai jinghikai kiba lah ban ai kam pat ïa ki hadien habud.
Shuh shuh kala ïathuh shaphang ka jingdonkam jong kine ki lad ai jinghikai kiba lah ruh ban wanrah ïa ka bha ka miat ha ka imlang ka sahlang bad kan pynkiew ruh ïa ka ïoh ka kot ha baroh ki liang.
La ïathuh kiba wan sha kane ka prokram ai jinghikai haka kam ri sniang kila don haduh 25 ngut, ha ka kam Beauty Therapist ki don 30 ngut, ha ka kam shet jingshet (foot processing) ki don 15 ngut bad ka kam shet (fast foot vendor) ki don 15 ngut baroh.
Kiwei de kiba la wan ban donlang ha kane ka sngi ki kynthup ïa u Dr. I. Kjam District Veterinary Officer, ma Lambor Suchen SDO MSSDS, ma R. Shadap DMM, MSRLS, ka Dr. JN Shullai Director MCSWA, DSP Crime WJHD kong C.W. Lyngdoh MPS. Ïa ka jingïalang la pynïaid da ka kong Sunita Suna (PM-MCSWA0) katba ïa ki kyntien ai khublei la ïoh na ka A.J. Nongkynrih Chief Functionary MCSWA.