Riangdo, Jylliew, 11: Wat hapdeng ka jingshah pynthut ha u slap, hynrei ki khynnah skul na ki skul bapher bapher kiba don ha Mawshynrut Civil Sub Division, ki nonghikai lem bad ki nongtrei sorkar, ha ka sngi thohdieng jong ka taiew, ki la mih ban ïaid rally ha surok da kaba pyrta ruh da ka sur ba jam, ba ngim dei ban pynjot ïa ka mei mariang hynrei ngi dei ban ai ka jingïada ba kyrpang, na ka bynta ka jingim ba shngaiñ jong ngi iwei pa iwei.
Ïa katei ka jingïaid rally la sdang na Lyngngam Presbyterian Higher School Mawthengkut bad pynkut haduh ka Dorbar Hall Riangdo kaba jngai kumba 2 km ei ei na katei ka skul.
Katei ka jingïaid rally ka dei ruh kum shi bynta ban rakhe ïa ka sngi kyrpang jong ka Mei Marïang ne ka World Environment Day, kaba la pynïaid da ka ophis jong u Block Development Officer ka Mawshynrut C&RD Block West Khasi Hills District, ha ryngkat ka jingïasnohktilang bad ka ophis jong ka Sub Divisional Officer Civil, Mawshynrut.
Ha katei ka sngi kyrpang jong ka Mei Mariang, la pynlong ruh ïa ka program thung dieng ha ki bynta jong ki shnong bapher bapher kiba don ha katei ka thaiñ bad hadien kata la pynlong ruh ïa ka jingpynïakop dro dur, jingïakop pyni nia bad kiwei kiwei.
Ha katei ka sngi ki nongpynïaid ïa katei ka jingïalang ki la ïoh ruh ban sam ïa ki khusnam bapher bapher sha ki khynnah, kiba la ïoh ban rah ïa ka nam lahduh bad haba ïadei pat bad ka jingthoh ïa ki slogan pyrshah ïa kiba pynjot ïa ka Mei-Mariang, ka skul Rev S.Wollington Memorial School Mawthengkut, ka la ïoh ban khur ïa ka nam lahduh kum kata ka slogan ba tbit tam.
Ha katei ka sngi la ïadonlang ruh u bah S.S Syiemlieh, Block Development Officer Mawshynrut C&RD Block bad bah Lamriche Kharmon EAC Mawshynrut, kiba la shim ruh ïa ka bynta ban ai jingkren lem bad kiwei kiwei ki ophisar, ki nonghikai na ki skul bapher bapher bad ki khynnah skul kiba la ïashimbynta shitrhem ha katei ka sngi.
