Bam duh ki thylliej ding ïa ka dukan, palat 2 lak tam ka jingduh nong u trai dukan

Mawkyrwat, Jylliew, 11: Ka long kaei kaei ka jingduhnong kaba khraw bad pyndiaw mynsiem na ka bynta uwei u rangbah ha kaba ka ding kaba klang ka la bam duh ïa ka dukan kaba don ha lad ‘sehbah, Mawkyrwat kaba u ju im ban kamai ja kpoh bad pyndap pynbiang na ka bynta ka ïing ka sem tang lyngba ka jingdie ïa ki jingbam bad kiwei kiwei ki mar.
Kane ka jingjia ba shah bam duh ha ka ding ïa ka dukan ka dei jong u bah Ismingstar Kharhari na ka shnong Mawten, South West Khasi Hills District ka la jia ha ka por 12:30 shiteng synïa jong ka step 7 tarik u Jylliew, 2022 ha kaba ka ding ba klang ka la bam duh khoit ïa ki tiar ki tar kiba don hapoh kane ka dukan naduh ki khaw, ki shna, ki buskit, ki um bad kiwei kiwei de bad ki don ruh katto katne ki taïar kali kiba thymmai ba u thmu ban die ki la ing lut.
“Ka jingduh nong na ka daw jong ka jingshah bam duh ha ka ding ha katei ka step ka kot haduh T. 2 lak tam”, ïathuh u bah Ismingstar Kharhari uba dei u trai dukan.
U bah Ismingstar Kharhari u la ïathuh ruh ba ha kaba ïa dei bad kane ka jingjia ha katei ka step hi tang shu ïoh jingtip na ki briew u la wan ban peit ïa la ka jong ka dukan bad haba u la poi u la ïohi ba ka la don ka kali pynlip-ding napoh ka Fire & Emergency Service ïa kaba ki para ba sah hajan jong ka dukan jong u ki la ïa ai jingtip bad da ka jinglah ban poi kloi jong ka kali pynlip-ding la ïoh ban pynlip noh ïa ka ding kaba klang.
Shuh shuh halor kane ka jingjia la ïathuh ruh ba la dep ban pyntip ruh ha ki bor ba halor khnang ba kin leh ïa kaba donkam.