Shillong, K’ Lyngkot 10: Artylli ki sengbhalang ki la ujor sha ka District Child Protection Officer (DCPO) jong ka North Garo Hills ha kaba ki la kynnoh ba ka la don ka jingshah leh beijot kaba shyrkhei bha pyrshah ïa kawei ka khynnah kaba dang 12 snem ka rta haduh ar sngi lynter haduh ban da jan poi ka sngi rakhe ïa ka sngi jong u snem thymmai.
Kine ki seng ki long ka A·chik Indigenous Justice Initiative Forum (AIJIF) bad ka A·chik Youth Welfare Organisation (AYWO) bad ha ka jingujor ki la iathuh ba ka khynnah, kaba la hap ban buhrieh noh ïa ka kyrteng, la ong ba ka la shah teh ki kti bad ki kjat bad ka la shah leh be-ijot naduh ka 27 bad haduh ka 28 tarik u Nohprah 2024.
Ki ar tylli ki kynhun ki la kam ba ki la ithuh ïa utei u briew ba la suba, da ka kyrteng bad ong ba u la dei uba la don ha ka rta kaba 55 ne 60 snem bad uba dei ruh u nongshong shnong jong kajuh ka shnong ba sah ka lanot.
Halor kane ka jingjia ka AIJIF bad ka AYWO ki la dawa ba dei ban pynshitom tyngeh ïa uba donkti katkum ka aiñ.
