Bajur palat ka dheng kali, sbak sakut ka Ambulance hapdeng surok hajan Anjali

Shillong, K’ Lyngkot 09: Na ka daw jong ka jingtei ïa ka surok 4 lane kaba naduh Umshyrpi shaduh 7 mer kaba dang ïaid shaid shaid haduh mynta ba bun na ki nongshong shnong ki la hap ban mad ïa ka jingdheng kali kaba jur bha ha kine ki sngi.
Ïa kane ka la lap da u nongthoh khubor ba ha kine ki sngi naduh ka por 1 baje nohphai sngi ka surok naduh anjali petrol pump kaba rim shaduh ki thaiñ 7 mer bun ki kali ki la hap ban shu ïaid da ka laiñ na baroh arliang.
Kaba sngewsih eh ka long ba ha kine ki sngi ka la don kawei ka jingjia ha kaba kawei ka Ambulance 108 kaba dangmut ban leit kit ïa kiba pang ka la sahkut lang sbak hapdeng surok na ka daw jong ka jingneh slem ka jingdheng kali.
Ha kane ka jingdheng kali la ïohi ba baroh arliang naduh kiba mut ban leit sha ki thaiñ Civil Hospital bad kumjuh ruh kiba mut ban kiew sha ki thaiñ laimer ki la hap ban mad lang ïa kajuh ka jingdheng kali kaba la neh slem bha.
Haba kren bad ki katto katne ki paidbah kiba la poi da ki kali jong ki haduh ïew Mawlong bad kiba wan na ki thaiñ Pynursla ki la ïathuh ba ki la poi ha 7 mer naduh ka por 10 baje mynstep hynrei ki dang poi pat ha ïew Mawlong haduh ka por 1 baje tam nohphai sngi.
Kumjuh ruh kiba wan na kiwei ruh ki jaka kiba thmu ban wan sha Shillong ki la mad ïa kajuh ka jingeh.
Lah ban ong ba ka jingbun palat ki kali ha kane ka nongbah Shillong ka la long ruh kawei na ki daw jong ka jingjur ka dheng kali ha katei ka sngi bad kumjuh ruh kumba la ju ïohi manla ka sngi.
Kumta halor kane ka la donkam ruh ïa ki paidbah ban sngewthuh ba ki donkam ban sei ïa ki kali jong ki tang ha ka por ba donkam kyrkieh khnang ba kan wanrah ka jingeh ïa kiwei pat khamtam kito kiba pang ba shitom, nangta kiba thmu ban leit shim dawai bad khamtam eh kito kiba shitom jur kiba la pynkit da ki ambulance kiba donkam kyrkieh ban hap pynpoi sha ki jaka sumar kiba don ha kane ka nongbah.
Lah ruh ban ong ba kumba ka long mynta ba ki skul kim pat sdang haduh katne ka jingdheng kali ka la jia manla ka sngi katno pat kan dang wanrah shuh shuh ka jingeh haba ki skul ki la sdang bad khamtam ba ka eksam matrik ka ban sa long shen ha u bnai Rymphang ba kan dang wanrah jingeh shuh shuh ïa ki khynnah pule kiba ïaleh ïa ki eksam jong ki.