Nongstoiñ, K’lyngkot, 03: Ha shuwa ba ka Central Recruitment Board jong ka tnad pulit ka jylla kan pynlong biang ïa ka jingpyn mareh ïa ki samla kiba thep kam pulit ha ka madan jong ka 4th Meghalaya Police Battalion kaba don ha poh ka Headquarter jong ka ha ka shnong Nongsohpian, ki nongïalam ka Hynñiewtrep Youth Council West Khasi Hills ki la leit ban ïakynduh ïa u bah Garod L.S.N.Dykes IAS Deputy Commissioner ka West Khasi Hills, ban kyrpad ïa u ba un tuklar lem halor ka jingbym biang jong ka madan ba la pynmareh ïa ki samla wad kam pulit.
U bah Lumlang Kharsyiemleih president ka HYC West Khasi Hills haba ïakren bad ki lad pathai khubor hadien ba ki la mih na kamra treikam jong u DC, u la ong ba hadien ba kiba bun ki samla thep kam pulit kiba la leit ban ïashim bynta ha ka jingïamareh kaba la pynlong ha katei ka madan ha u bnai Naiwieng jong u snem ba la dep, ki la ujor sha ka seng ba katei ka madan kam biang satia katkum ka jingthew ba ka sorkar ka la pynbeit.
Na ka liang ka seng ka la phah ban leit sorjamin bad ban thew bha, ha kaba ka la lap ba ka jing jngai jong ki track ba ki mareh ka don kumba 5089.75 mitar bad ka la tam kumba 89.575 mitar ïa ka jingjngai kaba ki dei ban mareh.
Katkum ba ka sorkar ka la pynbeit ka long ba baroh kiba lah ban pyndep ïa ka jingmareh kaba 5000 mitar kaba ki hap ban mareh haduh khatsan round bad kin pyndep hapoh ka por ba la buh.
Utei u nongïalam ka seng u la ong ruh ba hadien ka jingkyrpad jong ka seng na ka liang u Deputy Commissioner u la pyntip wut wut sha ka Central Recruitmet Board jong ka tnad pulit, ha kaba la kyntu ba kan pynkloi ban leit thew bad ban pynbiang bad kam dei ban tam ne duna hynrei ka dei ban long thik kumba la pynbeit.
