Shillong, Nohprah 22: Ka Laitkor SC ka la ïai bteng ïa ka jingïaidlynti ba paka jong ka na ka Group A da kaba jop baroh saw sien lynter ki jingïalehkai ha ka lympung Women’s Football League 2024 jong ka Shillong Sports Association ha SSA Stadium, Polo.
Ha ka sngi Saitjaiñ (21 tarik Nohprah, 2024) la sakhi ïa ka Laitkor kaba la pynjemkhnap ïa ka Madanrting SC haduh 14-0 kol.
Ka Iaraplang Nongrum (44′, 58′, 66′ minit) ka la ïoh ban thep hat trik na bynta ka Laitkor ha kane ka jingïalehkai, ha kaba baroh lai tylli ki kol ka la ïoh ban thep ha ki minit ïalehkai jong ka kylla miet.
Ka Ibashisha Khongwet (9 & 24 minit), ka Daiamon Makroh (27 & 32′ minit) bad ka Tracy Rympei (33 & 42’ minit) ki la ïoh ban thep mar ar kol, katba ka Ribahunshisha Kharshiing (4′ minit), ka Darishisha Kharlyngdoh (7′ minit), ka Sanfida Nongrum (16′ minit), ka Phisarai Marngar (47′ minit) bad ka Susimary Lyngdoh (62’minit) ki la ïoh ban thep mar kawei.
Haba phai sha ka jingïalehkai kaba bud jong ka Group-B, ka Rangdajied United FC ka la lah ban pynliem ïa ka Smit SC da 2-0 kol.
Ki kol na ka Inri-la-i-da Khongthaw (51′ minit) bad ka Ideibanri Kharpan (65′ minit) ha ka kylla miet ki la pynthikna ïa ka Rangdajied ban khur pura ïa ki lai point na kane ka jingïakhun.
Ha kane ka sngi yn sakhi ïa lai tylli ki jingïalehkai ka Women’s Football League 2024 jong ka Shillong Sports Association.
Kaba nyngkong kan long hapdeng ka Mawpat SC pyrshah ïa ka PFR Academy na ka Group A, ha ka por 10 baje mynstep. Nangta na ka Group-B, ka New Challengers pyrshah ïa ka Rangdajied United FC, ha ka por 12:15 mynsngi, nangta ka Smit SC pyrshah ïa ka Lumparing SC, ha ka por 2 shiteng mynsngi.
