Jowai, Nohprah 22: Ka Dorbar shnong Pdengshakap kaba pynïaid ïaka jingïalehkai football ïaka ba la tip kum ka 11th Secondary School Invitation Football Knock-Out Tournament 2024-25, ha kane ka sngi saitjaiñ (21.12), ha kaba la plie pyrda ïaka da u ma M. Pohsnem (SDO) PWD Amlarem Sub-Division, kum u kongsan ha ryngkat ka jingïadonlang u ma Oriswell Khyriem Sports Secretary, ki riew rangbah jong ka thañ bad ki nong kitkam jong ka shnong hi baroh kawei. Ha kane ka lympung la wan ban ïashim bynta haduh 35 tylli ki team na ka kylleng ka Ri-Lum Khasi bad Jaiñtia.
Ha shwa jong ka jingïalehkai ka la don ka jingïalang ba lyngkot kaba la pynïaid da u S. Buam uba long u rangbah shnong ka Pdengshakap, la ïoh ruh ïaka jingkren lyngkot na u S. Pakyntein uba long u Secretary shnong da kaba u ïathuh ba ïa kane ka Tournament la pynlong naka bynta ban kyrshan pisa ïaka Pdendshakap Secondary School kaba don hapoh jong ka shnong Pdengshakap, Amlarem Sub-Division.
U kongsan haba ai jingkren u la ïaroh ïaki nongkitkam jong ka Tournament bad ïa shnong hi baroh kawei kiba la lah ban pynïaid beit pynïaid ryntih ïakane ka Tournament man la u snem naka bynta ban kyrshan pisa ïaka skul kaba don hapoh shnong. Ka thong mynta u snem ka long 6 lakh ka lahduh kan ïoh Rs 3,50,000 kaba ar pat 2,50,000.
Haba phai shaka jingïalehkai ka KSF F.T na East Jaiñtia Hills kala jop ïaka Nongrim Hills SSCC na East Khasi Hill da 2-1 kol, ïaki kol jong ka KSF la ïoh ban thep nyngkong da u Donbok Lyngdoh haka minit kaba 44 bad ïaka kol ba ar pat la thep da u Phrang Pakem haka minit kaba 68. katba ïaka shikol jong ka Nongrim Hills la ïoh ban thep da u Gadiel Puia haka minit kaba 78.
Yn bteng ïaka jingïalehkai haka 28 tarik mynta u bnai por 12 baje ka Riverside Fc pyrshah ïaka Kynrumlang-I FC katba haka por 2 baje nohphai sngi pat ka Synroplang FC pyrshah ïaka Be My Fan.
Ha kane ka juh ka sngi la ïoh ruh ban pynlait paidbah ïaki Lucky Draw jong ka Pdengshakap Secondary School da u kongsan ha ryngkat ki dkhot ka shnong. Ki prizes ki long kumne, ka 1st Prize-Alto K10, 2nd Prize Scooty bad 3rd Prize Rs 50,000 tyngka, katba ka dor ticket-Rs 30 kawei. Ka sngi pynkhalai kan long ha ka 05.04.2025 ka ban dei haka sngi Final jong kane ka Tournament.
