Da ki jaiñ syaid sam ka HNYF Women’s Wing sha ki longïing baduk ha ka thaiñ 20mer ha Ri Bhoi
Nongpoh, Nohprah 16: Kumba ba sa tang katto katne sngi yn sakhi ïa ka jingrakhe ïa ka Christmas bad ban pdiang ïa u snem ba thymmai jong u snem 2025, ka HNYF Women’s Wing Sengkmie ryngkat ka HNYF Women’s Wing 20mer Circle mynta ka sngi ki la ai sngewbha da ki jaiñ syaid sha ki longïing baduk hapoh ka thain 20mer ha Ri Bhoi Disrtict.
Ïa kane ka jingsam ïa kitei ki jaiñ syaid la pynlong ha Dorbar Hall ka Shnong Pahammawlein, ha kaba la sakhi da ka jingdon lang ka General Secretary ka HNYF Women’s Wing sengkmie, ka Kong Phrinsibon Kharmuti; u President ka HNYF Northern Region, u Bah Hesting Lyngdoh, u Vice president ka HNYF Sengkmie u Bah Barnabas Manih; ka President ka HNYF Women’s Wing 20mer Circle, ka Kong Doramon Syngkli; u Rangbah shnong ka Pahammawlein, u Bah K. Syngkli bad kynthup kiwei ki nongïalam bad 25 ngut ki longïing baduk kiba la ioh pdiang ïa ki jaiñ syaid ba la ai sngewbha da ka seng HNYF Women’s Wing.
Kumba la pynpaw naduh ka General Secretary ka HNYF Women’s Wing sengkmie, ka Kong Phrinsibon Kharmuti bad u President ka HNYF Northern Region, u Bah Hesting Lyngdoh, kane ka jingai sngewbha ïa ki jaiñ syaid ka long shi bynta ka jingai sngewbha Christmas bad snem thymmai sha ki longïing baduk bad ryngkat ka jingkyrkhu kyrdoh ba kitei ki longïing kin dang ioh pdiang shibun ki jingkyrkhu ha kane ka Christmas bad snem thymmai.
Ki la pynpaw ruh ba ka seng HNYF kan ïa trei ryngkat ryngkat bad ki paidbah ha kaba kum kine ki kam kin dang bteng ban shakri sha ki paidbah wat la ki dei ki jingai barit bad ka thong jong ka seng ka long ban shakri kyrpang ïa ki baduk ba rangli ha ka imlang ka sahlang bad kiba donkam ka jingkyrshan ha ka longbriew ka man briew.
Shuh shuh, ki la shim ruh ïa ka kabu ban ai khublei Christmas bad snem thymmai sha baroh kitei ki longïing bad kumjuh ruh ïa ki paidbah ka jylla, da ka jingkyrmen ba kane ka Christmas bad snem thymmai kan long ka jingkyrkhu ïa ki paidabh ka jylla ba dang lah ban bteng ïa ka jingshakri na ka bynta ka jingïabha lang ha ka imlang ka sahlang, ki la bynrap.