Ban ong ka dei ka “Pain Killer” ka long kaba tohmet, pynphai nia u Bah Paul ïa u President ka VPP

Shillong, Nohprah, 14: U Myntri ka Sorkar Jylla uba khmih ïa ka tnat Jngohkai Pyrthei u Bah Paul Lyngdoh ha ka sngi Saitjaiñ u la ong ba ka jingkynthoh jong u President ka Voice of the People Party (VPP) u Bah Ardent Miller Basaïawmoit ba ka jingpynlong ïa ki tamasa ïaput ïatem da ka tnat Jngohkai Pyrthei ka Sorkar Jylla ba ki dei tang ki dawai “Pain Killer” ban pynklet ïa ki paidbah na ki kam bamsap jong ka Sorkar, bad ka jingpynsyrwa kai ïa ka pisa paidbah ka dei tang ka jingkren tohmet.
Haba pynphai nia ïa kane ka jingkren jong u President ka VPP, u Bah Paul Lyngdoh u la ong, kaba nyngkong ka dei ka Sorkar, kaba ar ka tnat Meghalaya Energy Corporation Limited (MeECL) bad kaba lai ka dei ka tnat Jngohkai Pyrthei kaba bsa ïa ki paidbah nongshong shnong jong ka jylla.
“Kine ki jingkren ki long ki bym don jingkitkhlieh namarba ngi ngi don ïa ki jingshisha kiba kyrshan ïa ka jingpyrshang jong ka Sorkar ban kyntiew ïa ka kam shang pyrthei,” ong u Bah Paul.
“Tang na ka konsad jong u Bryan Adams ki jingmyntoi ba ngi lah ban ïohi, kaba nyngkong, ngin peit shwa tang ïa ka Instragram Account jong u kaba u don da ki million ïa ki nongbud da kaba u la thep ïa ka jingwan jong u ban rwai ha Shillong, kaba mut ba ki briew satlak ka pyrthei ki bym pat ïohsngew ïa ka kyrteng jong ka Shillong mynta ki la tip kaei ka Shillong,” u la ong.
“Ka long kumjuh ruh kumba long kiwei pat ki nongrwai, u Alan Walker, u Akon bad kumta ter ter. Kaba ar, ha ka sngi ba u (Bryan Adams) wan ngi la pynkup da ka jaiñ Ryndia kaba u la kup bad u la rah shuh shuh ïa ki jaiñ Ryndia ban sam lem sha ki nongïarap tem jong u. Kaba lai, u la wan ban iuhkjat da kaba hiar da ka liengsuiñ ha Shillong Airport, Umroi, kaba dei hi kawei sa kawei pat ka jingpynpaw pyrthei ïa kane ka kad liengsuiñ jong ngi ha Umroi,” la pynksan u Bah Paul.
“Nalor kata, ka jingthmu jong ka konsad ka long ban khring ïa ki nongshang kai pyrthei sha kane ka jylla jong ngi, bad kiba ïohnong nangta, kiba die sha, kiba die jhur, kiba don ïa ki Stall ha ka jaka tem ki dei ki briew jong ngi suda,” u la ong shuh shuh.
U la ïathuh ba dang hynnin ka sngi Thohdieng u la ïakynduh ha Laitumkhrah ïa ki nong Goa kiba wan sah kai ha Shillong naduh ka sngi ba don ka konsad jong u Bryan Adam bad ban leit shang kai sa sha kiwei kiwei ki bynta jong ka jylla jong ngi. Ban ong ba kata ka dei ka “pain killer” ka long kaei kaei kaba tohmet namarba kiba ïoh jingmyntoi ki dei beit hi ki briew jong ngi.
“Wad ïa kane da lade, kum ha ka tamasa Cherry Blossom, ki briew kiba ju rep kba (ha Bhoirymbong) ki ong ba ki dang lah ba ka wan ka tamasa Cherry Blossom namarba ki ar sngi jong ka tamasa ka la pynmih lut ïa kaei kaba ki hap pynlut da ki bnai ha kaba rep kba,” la ïathuh u Bah Paul.
“Ki paidbah ki dei ban tip, bad ngan sa ïasam ruh ïa ki jingtip kiba bniah ïa ka jingwan rung jong ki nongjngohkai pyrthei kiba wan na shabar,” u la ong.
“Tang ha ka konsad jong u Bryan Adams ki nongpeit kai ki don haduh 30 hajar ngut bad na kita ym duna ïa ka 65% ki dei kiba wan nabar jong ka jylla Meghalaya,” la ong shuh shuh u Myntri ka Sorkar Jylla bad bynrap, “lada uwei uwei na ki, u pynlut tang mar 20 hajar kheiñ katno ka khajna ka la wan sha kane ka jylla jong ngi. Dei na kata ka daw ba ka kam jngohkai pyrthei mynta, hadien ka Sorkar bad ka MeECL kaba lai ka dei ka kam jngohkai pyrthei kaba bsa ïa ki paidbah jong kane ka jylla.”
Haba kylli, u Myntri ka tnat Jngohkai Pyrthei u la jubab da kaba ong, “kijuh ki briew hi kiba ong balei ba la khang ïa ki skul ha ka sngi ba la pynlong ïa ka konsad jong u Bryan Adams, kin dei kijuh ki briew ba lada plie ïa ki skul ha kato ka sngi, ki khynnah skul kim poi sha ing haduh 7:00 ne 8:00 baje mynmiet kijuh hi kin ong ka sorkar biej aiu kum kane kaba la tip lypa ba kan don kum kane ka jingïaput ïatem kaba heh kaba haduh 30 hajar ngut ki briew ruh ka dang phah hi ïa ki skul ban plie. Ngin ïa ong aiu, kata hi ka dei ka jinglong briew ban shu wad dong.