Shillong, Nohprah 14: Ka North East Students Union (NESO) ka la khot ïa ka jingïalang jong ka Executive Council Meeting kaba la long ha Guwahati ha ka sngi Thohdieng ha kaba kane ka sngi la iakren bniah halor ka jinglong jingman ha Manipur.
U Bah Samuel B Jyrwa shongknor ka NESO ula ong ba hadien ba la kut ka jingïalangu la ïathuh ba hadien ka jingïakren kaba bniah halor ka jinglong jingman ha ka jylla Manipur bad ki la shim ïa ka rai ba ka jingïaleh ban wanrah ïa ka jingshongsuk ha ka jylla Manipur kan ïai bteng.
Ïa kane ka kynhun ban wad ïa ka jingsuk ha ka jylla Manipur yn ïalam da u Secretary General u Nutsikhoyo Yhobu bad ka jingkyrshan ki samla pule bad u nongai buit kin ïakren bad ki kynhun bapher bapher ban wad ki lad ki lynti ban wanrah ïa ka jingsuk ha jylla Manipur.
Ha ka juh ka por ka seng samla pule NESO ka pynpaw ïa ka jingpyrshah jur ïa ka jingbym leh eiei ka sorkar pdeng wat hadien khatphra bnai ki jingïakhih hapoh katei ka jylla Manipur ha kaba ka sorkar pdeng kam shym leh eiei ban wanrah ïa ka jingsuk.
Ha kane ka jingïalang ka NESO ka la ïakren ruh ïa ka jingïada ïa ki rit paid kane ka thaiñ hapoh ka riti synshar ka ri India namar ka Assam Accord ka la shu neh ha suiñ la bun bun snem kaba la kot mynta 29 snem ha kaba ki paidbah ka jylla Assam ki la mad ïa ki jingeh.
Ka NESO ka la ïakren ruh ba dei ban khang khyrdep ïa ki khappud bad Indo-Nepal border bad khappud bad ka Bangladesh dei ban ker sainar shiah bad ban pahara ha ka rukom kaba dei, kumba ka long ka sorkar pdeng ka dei ka nongpeitkai ïa ka jingwan rung ki khar Bangladesh.
Kum ka jinglong jingman mynta ha Bangladesh ka NESO ka dawa na ka sorkar pdeng ba kan pynkhlaiñ ïa ka jingpahara ha khappud bad ka Bangladesh ban pynthikna ba ki khar Bangladesh namar kumba ka long mynta bun ki District ha Assam ki trai shnong ki la kylla rit paid.
Ha Assam ha ki 11 tylli ki District ki trai shnong ki la kylla rit paid ha la ka jong ka jaka bad kumba ka long ha ka jylla Tripura, ka la dei ka por ba ka sorkar pdeng ka dei ban peitbha ïa ka khappud hapdeng ka India bad Bangladesh ba khang khyrdep ïa ki khappud bad ka Bangladesh ban khanglad ïa ka jingwan rungtuh.
Ha kane ka jingïalang ka NESO ka la ïakren ïa ka jingjia hapoh ka skulbah NEHU ha kaba KSU ka la thoh sha u Myntri ka tnad pule ka sorkar pdeng ban ïoh ïa ka jingïada ki hok jong ki samla pule ha katei ka skulbah NEHU.
