Shillong, Nohprah 11: U Myntri ba khmih ïa ka tnat Public Health Engineering (PHE) u Marcuise N Marak ha ka sngi baar u la pyntip ba ka jingpyntreikam ïa ka Jal Jeevan Mission (JJM) la buh ka thong ban pyndep ha u bnai Lber jong u snem ban wan.
Haba kren sha ki lad pathai khubor u Marak u la ong ba haduh mynta ïa ka kam la dep ban pyndep kumba 81.39 percent. “Ka aiom ban pyntrei ïa ka kam ka la sdang bad baroh ki contractor bad companies mynta ki la don ha ka kam bad ngin pyrshang katba lah ban pyndep ïa kane ka kam ha u bnai Lber jong u snem,” u la bynrap.
Ki don palat 6000 tylli ki project hapoh ka JJM bad baroh la dep ban buh dak. “Baroh ki project la dep ban buh dak hynrei ngin ym lah ban ïoh ka jingbei pisa na ka sorkar pdeng,” ong u Marak.
U Myntri ha kawei ka liang u la pyntip ruh ba ki don katto kane ki projek kiba ym lah ban pyndep na ka daw jong ka jingslem ban ïoh jingbit na ka tnat ki kam Khlaw.
“Ki don ki jingeh bad ngi pynbeit ïa kine kum ka jingïoh jingbit na ka tnat Khlaw kaba dangsah haduh mynta, ngi dang hap ban ïoh ka jingai jingbit ba ka tnat khlaw na ka bynta katto katne ki project,” u la ïathuh.
Haba kylli u Myntri u la ong, “Ki jingtyrwa kiba kum kine na ka liang ka tnat ba dei ban shna ha ki jaka bym don ki dieng bad ngi hap ban pynthikna ba kan ym dei ban don ka jingpom ïa ki dieng tang ban pyndep ïa kane ka project. Hynrei namar ka jaka ka hap hapoh ka jingpeit ka tnat Khlaw kumta donkam ïa ka forest clearance.”
U Marak u la pynpaw ruh ba ka jingtyrkhong jong ki tyllong um ka la dei kawei kaba la ktah ïa ka jingpyntreikam ïa kane ka JJM.
“Ngi dang pyrshang ban ïoh shuh ka pisa bynrap na ka jylla. Nga la dep ban ïasyllok bad u Myntri Rangbah ba lada ka sorkar pdeng kam bei pisa ïa ngi, ngin hap ban ïoh katto katne ka pisa na ka sorkar jylla khnang ba yn lah pynkylla ïa ki tyllong khnang ban lah ban pynneh ïa kine ki project,” u la bynrap.
Ha kajuh ka por u Marak u la ba bun na ki kam ïoh jaka la dei ban pynbeit da ka tnat na ka bynta ka jingïaid beit ka jingpyntreikam ïa kane mission.
