SHILLONG, Nohprah 11: Ka Meghalaya Jeet Kune-Do Association (MJKA) ha ryngkat ka jingïatreilang bad ka Meghalaya School of Martial Arts (MSMA) hapoh ka jingpynïaid jong ka Jeet Kune-Do Martial Arts Federation of India (JKDMFI) kan pynlong ïa ka lympung ïalehkai ‘National Jeet Kune-Do Championship 2024’ kaba shiphew ha nongbah Shillong.
kane ka Championship kan long ar sngi lynter ha kaba yn sdang naduh mynta ka 12 tarik haduh 13 tarik u Nohprah, 2024 bad yn pynlong ha Neigrhims Indoor Stadium, Mawdiang diang, Shillong.
Ka Jeet Kune-Do ka dei ka jingïalehkai ‘Martial Art’ kaba la pynwandur da u Bruce Lee (L) u khlur ba pawnam jong ka Martial Arts ha ka pyrthei naduh u snem 1965 (Los Angeles). Ka long ka jingïalehkai kaba ym don tynrai, kaba kylla bad kaba ïai tuid. Ka long kaba suk bad kaba beit bad kaba treikam khlem da pynsyrwa kai ïa ka jingkhih ne ka jingkhih kaba ym da donkam. ïa ka jingïalehkai Jeet Kune-Do la dep kynthup lypa ha ka School Games Federation of India (SGFI) bad ruh da ka TAFISA bad kiwei kiwei.
Kane ka long katkum ka kyrwoh na ka Meghalaya Jeet Kune-Do Association (MJKA) ha kaba ïadei bad ka jingpynlong ïa katei ka Championship ha nongbah Shillong ban sdang naduh mynta ka sngi.
