Pynlyngkot noh ïa ka list ki Nongsakhi ha ka jingtohkit sia lieh thung Nonghikai bthah ka ïing Bishar ïa ka CBI

Shillong, Nohprah 09 : Ka ïing Bishar High Court jongka jylla ha ka sngi Nyngkong, kala bthah ïa ka Central Bureau of Investigation (CBI) ban pynduna ne pynlyngkot noh ïa ka thup ki nongai sakhi haba ïadei bad ka jyrsieh “tah sia lieh” ha ka thungkam nonghikai u snem 2009 ba kynnoh donkti ïa ka Myntri Sorkar Kong Ampareen Lyngdoh kaba peit ia ka tnad pule puthi ha kato ka por bad mynta pat kum ka myntri ka koit ka khiah. Ha ka hukum bala pynmih hadien ba shong bishar ïa ka mukotduma, ka ïing Bishar ba la khlieh da u Chief Justice IP Mukerji kala ong “Dei ban kiar ïa ka jingpynbun ba khlem nongrim ia ki nongai sakhi bad ki sakhi. Halor kine ki bynta, la kyntu ïa u DGSI ban pynsngewthuh ïa ka CBI ba kan pynduna ïa ka thup ki nongai sakhi”. “Tad hadien bala pynbeit khatduh ïa ka thup da ka CBI, ka dei ban aiti ïa ka thup sha ka Criminal Court haba ïadei bad ka jingshim bishar ïa ki nongai sakhi. Ka Criminal Court ka dei ban shim rai halor kane ka kam. Ka dei ban shong bishar ïa ki aplikeshon. Buh ïa kane ka mukotduma ban shong bishar biang ha ka 20 tarik Rymphang, 2025” kala ong. Ki don lai ngut kiba shah kynnoh ha kane ka kam mukotduma kam bymman, kawei na ki ka dei ka Myntri jong ka Jylla, Kong Ampareen Lyngdoh, kaba bat ïa ka Tnad ka Koit ka Khiah, IPR bad ka Tnad ka rep ka riang. Ka jingtohkit ïa kane ka case PS Case No.62(07)2011, under Sections 120B, 167, 466, 408, 34 IPC) la aiti sha ka Central Bureau of Investigation (CBI) ba kan tohkit da ka ïing Bishar High Court. Ka ïing Bishar ka ong ba haduh mynta ym palat ïa ka 20 ngut ki nongsakhi la dep ban sngap ha ka jingbishar. La ïoh jingtip ba ki don haduh 162 ngut ki nongai sakhi. Kala ong ba ka mukotduma bala mudui da ki nongshah kynnoh ka long halor ki nongrim bapher bapher. “Ka nongrim bala pynpaw da ka nongshah kynnoh ba nyngkong kaba dei ka Myntri sorkar jong ka Jylla ka long ba ka Charge-sheet ka khlem pynpaw ïa kano kano ka jingdonkti. Na kaei kaba paw nyngkong, nga don ka jingsngew ba kane ka jingbishar kam bymman na ka PS Case No.62(07)2011 kala sahteng la palat 13 snem. Ka por kala dei ban pynwai noh ïa ka” ong ka ïing Bishar ha ka hukum.