Shillong, Nohprah 09: Ka Nongrim Hills SC ka la pynliem ïa ka Nangkiew Irat da 5-2 kol ha ka jingïalehkai ba itynnat jong ka lympung ïalehkai OC Blue Shillong Premier League 2024 ha madan First Ground- SSA Stadium, Polo, hynne ka sngi Nyngkong. Ka jingïalehkai shuwa kane, la sakhi ïa ka Laitkor SC kaba la pynliem da 2-0 kol ïa ka Ryntih FC.
Ka jingjop kan jin da la kyntiew ïa ka Nangkiew Irat sha ka kyrdan ba ha khlieh duh hynrei ka jingbym skhem ki jingïada shadien ka la pynlong ïa ka Nongrim Hills ban seisoh bad khur ïa ka jingjop. U Alem Khongwir (15’, 52’P), Mebanshan Suting (22’), Bankit Nongrum (24’) bad u Banshemphang Kurbah (62’) ki la pynkhihjar na bynta ka Nongrim Hills, katba u Ronaldkydon L Nonglait (33’, 90’+2) u la pynkhih ïa ki ar kol na bynta ka Nangkiew Irat.
U Alem bad u Mebanshan ki la pynkyndit da kaba shim kabu ïa ka jingbym poi pyrkhat ki rangapdien ka Nangkiew Irat ban thep ïa ki ar kol tang hadien 20 minit tam ba la ïaid ka por, kane ka la urlong hadien ba ki la mareh biang por sha ka bol bad pynrung lyngba u Surjay Kumar Pariyar (rangapkol ka liang pyrshah) u ba la sah marwei ban ïada ïa ka kol na ki player ka Nongrim Hills.
Ka kol kaba lai ka la wan lyngba ka bol pashat kaba u Bankit u la pynrung, kaba la pynlong ïa ka Nongrim Hills ban lamkhmat 3-0 kol tang hapoh shiteng kynta, kaba la long kaei kaei kaba phylla. Hynrei, ka Nangkiew Irat ki la lah ban pynduna ïa ka jingshah lamkhmat shuwa ban wai shiteng lyngba u Ronaldkydon.
Ka Nongrim Hills ka la ïoh ïa ka kabu ksiar ban pynkhihjar na ka penalty hadien ba u Wanpynshngain Nongsteng u la pynur ïa u Bankit hapoh ka phyllaw kol, bad khlem da pynsepei u Alem u la pynkhih ïa ka kol kaba saw shuwa ba u Banshemphang un pynthikna ïa ka jingjop da kaba thep ïa ka kol kaba san.
Hadien kane, u kapten ka Nangkiew Irat u Shaibor Nongrum u la lait thaw na ka shah beh na madan hadien ba u la leh bun tylli ki foul wat ha ka por ba u ïoh lypa ïa ka yellow card, kawei na kine ka la pynmynsaw ïa u Fernando Malieh bad la donkam kit noh sha Hospital. Hynrei kane ka jingïalehkai ka la long pat kaba seisoh ïa ka Nongrim Hills watla ka la shah pynphai biang sa shi kol ha ka khyllipmat shuwa ban kut na u Ronaldkydon.
Ka jingïalehkai shuwa kane, hadien ka kylla step kaba khlem don ba lah pynkhihjar, u Moonstar Nongsiej (66’minit) bad u Samborwell Mynsong (78’minit) ki la thep mar kawei ban pynthikna jingjop ïa ka Laitkor pyrshah ïa ka Ryntih, kaba la mad ïa ka jingshah rem kaba hynñiew sien lynter.
Ha ka por ba pyrshang ñion shakhmat, u Moonstar u la mareh sha liang kadiang khlem kano kano ka jingshah khanglad bad u la thep ïa ka bol lyngba u rangapkol ba la mih bujli jong ka Ryntih, u Luckystar Lawai bad hadien 12 minit u Samborwell u la thep ïa ka kol kaba ar.
ïa mynta ka OC Blue SPL 2024 kan sangeh shipor na bynta ban ai jingkyrshan ïa ka kynhun ïalehkai ka jylla Meghalaya kaba la mih ban leit ïashimbynta sha ka lympung ïalehkai Senior Men’s National Football Championship na bynta ka Santosh Trophy 2024-25 final Round hynne ka sngi Nyngkong. La jin baroh ki rangïalehkai jong ka jylla ki dei kiba la jied na ki klob SPL.
