Jowai, Nohprah 08: Ka lympung ïalehkai phutbol jong ka kyrdan ‘Super Division Football Tournament – 2024’ ïa kaba la tip kum ka “U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long ha ka 07 tarik Nohprah (sngi Saitjaiñ) ha madan Kiang Nangbah Stadium, Dongmihsngi Jowai.
Haba phai sha kane ka jingïakhun Semi Final kaba ar la sakhi ïa ka Nangbah Mulang kaba la pynthikna ïalade ban rung sha ka final da kaba pynliem noh ïa ka Ladthadlaboh. Ka jingïakhun ka la kut ha kaba ka Nangbah Mulang ka la jop da 3-0 kol.
Watla ka kylla step ka la kut khlem ïoh pynkhihjar hynrei ka Nangbah Mulang ka la ïoh pat ban thep haduh 3 kol ha ka kylla miet. Ka kol kaba nyngkong ka dei kaba la kum bakla thep hi da u Dangaitlang Mulieh (Own Goal-48’ min) khyndiat minit mar ïa bteng ka kylla miet.
Ka Nangbah Mulang ka la pynthikna syndon ïa ka namjop da kaba thep sa ar tylli ki kol ha ki minit shuwa ban kut ka por lyngba u Timmy Ryngkhlem (85’ minit) bad na u Niponghi Sumer (90+2’ minit).
Kumta kane ka jingjop ka la pynlong ïa ka Nangbah Mulang ban rung sha ka phainal jong kane ka lympung ha kaba kan ïakhun pyrshah ïa ka Demthring SC na bynta ka burom lahduh.
