Shillong, Nohprah 08: Ka kynhun ïalehkai kriket kynthei jong ka Shillong Cricket Academy ka la pynliem noh ïa ka St Anthony’s Academy da 3 wiket ha ka U-19 Girls Cricket Tournament 2024 kaba la long ha Don Bosco Mini Stadium hynnin ka sngi Saitjaiñ.
Ka St Anthony’s Academy ka la jop ïa ka jingkynting (toss) bad ka la jied ban tied nyngkong ha kane ka jingïalehkai T20. Ka Adelakmen bad ka Isha ki la lah ban sdang da kaba seisoh hynrei baroh arngut ki la shah pynkhyllem noh lyngba ka run out, kiba shadien ki la kamai 15 shuwa ba ka Dawanshisa kan tied 8 bad ka Eliza 17 ron kaba la ïarap ïa ka kynhun ban kynjoh 109 ron bad hap lut ki nongtied ha ka 19.4 over.
Ka Dawanshisha ka la ïoh ban khur lai wicket haka por ba bol hynrei ka jingskhem ki nongtied ba nakhmat jong ka Shillong Cricket Academy – ba kynthup ïa ka Lasusa (16) bad ka Leeney (18) ka la ïarap ïa ka kynhun ban kynjoh ïa ka thong ba la buh hadien tang 18 over.
Haba phai pat sha ka lympung ïalehkai U-14 jong ki shynrang, ka jingïakhun semifinal kaba ar hapdeng ki kynhun ïalehkai A bad B jong ka St Anthony’s Cricket Academy kan long ha ka sngi Nyngkong. Kane ka jingïalehkai la thmu ban long ha ka sngi Thohdieng hynrei la pynsangeh noh namar ba dum ka suiñbneng. Ka Shillong Cricket Academy A ka la jop ïa ka semifinal kaba nyngkong pyrshah ïa ka B team.
Ha kane ka lympung la ïashimbynta haduh hynriew tylli ki kynhun khynnah shynrang bad ar tylli ki kynhun kynthei na ki shlem ai jinghikai bapher bapher ha kylleng ka nongbah, ba kynthup ïa ka Shillong Cricket Academy kaba don ha Lawsohtun, ka St Anthony’s Cricket Academy, ka Nongthymmai Cricket Coaching Centre bad ka East Khasi Hills Cricket Association Academy. ïa kane ka lympung la kyrshan ruh da ka Meghalaya Cricket Association.
