Lyngba ka VIP Road yn ïoh wan ïeng biang ki bos Night Super sha ISBT Mawïong

Shillong, Nohprah 07 : U Symbud Myntri Rangbah ka Jylla ab dei peit ïa ka tnad PWD, Bah Prestone Tynsong u la ong ba ka jingpyntrei ïa ka surok kaba pynïasoh na Umroi kaban mih sha Mawlai Bypass bad ter ter sha Inter-State Bus Terminus (ISBT) kaba don ha Mawlai Mawiong ka la ïaid stet bha mynta bad la khmih lynti ba shen hi yn sa lah ban pyndep noh.
Na ka u Bah Prestone u la ïathuh ruh ba ïa kane ka surok kaba la tip ruh kum ka VIP Road, ka jingpyntrei ka la ïaid kumba 80 persen ei ei mynta.
“Kane ka kam ka la ïaid stet bad nga nud ban ong ba ka la poi kumba 80 persen ei ei bad mynta ki dang trei shaid shaid watla ki don katto katne ki jak ba ki ong ba ka kham eh ban kiew hynrei na ka liang ki Engineer bad ka Kompeni ki la peit ïa kata. Kumta ngi kyrmen skhem ba ym slem shuh hi ba kan dep,” u la ong.
Shuh shuh na ka liang u Symbud Myntri Rangbah u la ïathuh ruh ba lada lah ban pyndep kloi ïa katei ka surok kan pynsuk ïa ki bos Night Super namar kumba long haduh mynta kine ki bos heh kiba leit na kawei ka jylla sha kawei pat ki hap ban sangeh noh tang harum ka jingkieng Damsite.
“Kumta, lada lah ban pyndep kloi kine ki night super ki lah ban ïaid na Mawlai Byepass, kaa na ISBT ban mih beit sha Umroi namar kato ka VIP Road ka mih beit sha Umroi bad nangto pat ban mih sha Dam ka la jan bha,” u la bynrap shuh shuh.
Lah ban kdew hangne, ba ka jingpyntrei ïa katei ka surok na Umroi sha Mawlai ka long ban ailad ïa ki kali ba kham heh khamtam ia ki bos Night Super ba kin wan ïeng hapoh ka Inter State Bus terminus (ISBT) jong ka Sorkar kaba don ha Mawlai Mawïong. Naduh ba la khang ban ïaid ïa ki kali heh na ka jingkieng Umïam katei ka jaka pynïeng bus jong ka Sorkar ka la shu sah khongreng.