Ka Tamasa Spoken kan ai lad ïa ki nongthoh kot ka jylla ban kiew shaphrang, ong u Bah Paul

Shillong, Nohprah 07: Ka nongbah Shillong ka la pynlong ia ka Tamasa Spoken kaba heh hapoh Asia ha kaba ia kane la pynlong ha Wards Lake. Ha kane ka Tamasa ki la don bun ki jingïathuh khana kiba la pynpaw halor kane ka tamasa. Ïa kane ka tamasa la kyrshan da ka tnat Tourism, jong ka sorkar Meghalaya, ha kaba u Myntri ka sorkar u Bah Paul Lyngdoh, bad u Bah Cyril VD Diengdoh, IAS, Director of Tourism ki la don lang ha kane ka sngi.
Ha kane ka prokram na ka liang u Bah Paul Lyngdoh u la ong, “Ka long ka khyllipmat kaba kmen na ka bynta ka tnat jong ngi ban ïohi ïa ka jingsdang ban wan kiew jong kiba wan jngohkai ha kaba kane ka la kyntiew ïa ki kam jngohkai ha kane ka jylla bad kumjuh ruh kane ka tamasa kan kyntiew bad ailad ïa ki nongthoh kot ka jylla ba kin kiew shaphrang.”
U la pynpaw ruh ïa ka jingai khublei ïa ki nongshong shnong kiba la ai ka jingkyrshan bad kumjuh ruh ïa ki kynhun khamtam ïa ka Kommune bad kiwei kiba la shim bynta ha kane ka kam, u Bah Paul u la ong ruh ba haba la pynpaw ïa ka kyntien spoken hapoh ka brand, ki trai ri trai muluk jong ka Meghalaya ki don ïa ka khana kaba jrong bha ha kaba ïadei bad ka ktien, ba kynthup ruh ïa ki jingkren bad kiwei kiwei kumba la buh da ki longshwa manshwa.
U la ong ba kane ka rynsan kan long ka kabu ka ban ïarap ïa ki nongthoh poitry, ki nongthoh kot ba kin lah ban ïa sam ïa ki jingmut jong ki bad kane ka long kaba donkam bha ha kane ka juk kaba mynta.
U Bah Paul u la ong ba kane kan ailad ïa ki samla jong ka Meghalaya ba kin lah ban ïasam ïa ki jingmut jong ki ha kane ka rynsan ha kaba ïadei bad ki riti dustur ka kolshor bad kumjuh ruh ha ka put ka tem.
Na ka liang u Bah Cyril Diengdoh u la ong ba ka Shillong kadei ka nongbah kaba nyngkong ban ïoh ïa ka edition jong ka Spoken Fest kaba long shabar jong ka Mumbai. U la bynrap ba kane ka tamasa ka ai ïa ka rynsan ïa ki nongthoh kot na ka jylla ba kin pyni ïa ki sap ki phong jong ki bad kiwei pat ki riew shemphang jong ka ri.
U la ong ruh ba kane ka Spoken Fest ka ailad ïa ki riewshemphang kiba stad ba kin lah ban kyntiew ïa ki kam jngohkai ha kane ka jylla ruh.
Ha kane ka sngi la don ruh ki jingrwai bad kiwei kiwei ki prokram kiba la pynbyrniah ha kaba la wan ruh ban ïashim bynta da kiba bun ki nongthoh kot bad ki nongthaw jingrwai kiba kynthup ïa u Vancouver Shullai bad Marbamonlang Rani kiba la wan ban shim bynta shitrhem ha kane ka sngi.
La ïoh ïa ka jingïathuh khana na ka Actress ka Kareema Barry.
Ka la don ruh ka jingai jingrwai na ka kynhun hip-hop/R&B artist, Meba Ofilia bad hip-hop Khasi Bloodz bad kiwei kiwei.