U President ka Congress u la kren tam laiñ shaba palat pud, ong u nongïalam ka Seng UDP

Shillong, Jylliew 7 : U Myntri ka tnad kam pohïing ka jylla uba dei ruh uwei na ki nongïalam ka United Democratic Party (UDP) u la ther tyngeh ïa u President ka Meghalaya Pradesh Congress Committee (MPCC) u ma Vincent H Pala da kaba ong ba une u nongïalam ka Congress u la kren tam laiñ shaba palat pud ban shu kynnoh bamsap ïa ka UDP.
“ U ma Vincent u la kren laplah khlem da ñiew shuh ïa ka akor ka burom lajong kum u President ka Congress, ha ka jingshisha u dei ban bishar bniah shwa ïa lade balei ba baroh ki MLA ka Congress ki phet lut u tang shu shimti kum u President bad mynta u sdang ban kynnoh pat la lut khlem ki nongrim bad khlem jingshisha” ong u ma Lahkmen.
U la ong lada u dei da shisha u riewsaiñ pyrthei ula dei ban pynkhreh ïa ki prokram bad polisi jongka Congress na ka bynta u 2023. “ Hynrei na u riewsaiñ pyrthei uba la ih bad uba la long MP ruh la lai sien mynta ban shu kynnoh ïa baroh ba ki bamsap ka long kaba ym lah ban pdiang da lei lei ruh. Nga burom ïa u hynrei ban mih na ka shyntur jongu kum kine ki jait ktien ki long kiba ngam lah ban pdiang bad ngam ju poi pyrkhat” ong biang um a Lahkmen.
“ Nga kwah ban pynkut tang katne ba u kren lap lah khlem nongrim tangba u leh mynleh hok pat ïalade” ong u ma Lahkmen.
Haba la kylli kumno u sngew halor ka jingpynkhreh jongka Congress ban chargesheet ïa ka sorkar MDA u ma Lahkmen ula ong une u President ka MPCC u sngew ïalade la kum uta u nongujor, u ophisar u ban tohkit bad u nongrai pynrem bad u nongbishar ai ba ki paidbah kin bishar ïa u.
U ma Pala u la kynnoh dang ha kine ki khyndiat sngi ba ka UDP ka kham bamsap ban ïa ka NPP bad kiwei kiwei ki party kiba don hapoh ka sorkar MDA khamtam ha kaba ïadei bad ka kam khaii dewiong beaiñ.