Shillong, Jylliew 07: Hadien ka jingjia kaba pynpangnud shibun ha kaba iwei i heprit ba dang 3 snem ka rta i la duh ei baroh artylli ki kti na ka jingshah lympat ha ka ding elektrik, ka KSU ka la dawa na ki bor pynïaid ka MeEPDL, kidei ban jurip lut ïa baroh ki Transformer, khnang ba kan nym jia shuh hadien habud.
Lah ban kdew hangne ba ka 21 tarik bnai ïaïong mynta ka snem, iwei i heprit ba la tip kyrteng kum i Ibapynhun Iawphniaw, khun jong i Katbina Iawphniaw bad i Bah Synsharlang Syiemlieh naka shnong Mawkohphet, South West Khasi Hills District, i la hap ban duh noh ïa baroh artylli ki kti na ka daw ka jingshah bat ne lympat ha ka ding elektrik katba i dang ïalehkai hajan uwei u Transformer uba khlem don jingker eiei sawdong ka jaka ba la buh. Mynta ine i heprit i dang don hapdeng ka jingshah sumar .
Ka KSU ka ong ba kane ka jingjia ka dei ka jinglehsting bad ka jingbymdon jingkitkhlieh jong ki bor ba dei peit ha kaba watla u Transformer u don hajan jongka Skul hynrei ym shym la ker bad kane ka dei ka dawbah ba sa jia kiba kum kine ki jingjia ba sngewsih.
Haba iadei bad kane ka seng ka dawa ba ka MePDCL ka dei ban siew bad pynbiang iaka bai sumar bad kiwei kiwei ki jinglut na ka bynta ka jingphah sumar ïa ine i heprit naduh kaba sdang bad haduh ba in da mih na ka jaka sumar . Ha kajuh ka por ka seng ka dawa ba dei ban pynbiang ïaka bai bam ha shilynter jingim ïa ine i heprit namar kane ka jingduh noh jongi ïa baroh ar tylli ki kti ka la buh jingeh ïa i bad pynjynjar ruh ia i ha ka lawei.
Ha kajuh ka por ka Seng ka dawa ruh naka tnad MePDCL ba ka dei ban phah jurip ia baroh ki transformers, ki nar pynpar bor ding ilekrik bad ïa kiwei kiwei ki bynta ba ïadei bad ka bording hapoh South West Khasi Hills District bad Mawsynram Block . Ym tang katta , ka ophis ka dei ban maramot ïa ki bynta ba dei ban maramot bad ban pynthikna ba baroh ki transformer dei ban phah ker noh mardor khnang ba kiba kum kine kiei kiei kin nym jia shuh nangne shakhmat.
