Shillong, Jylliew 07: Arngut na ki nongtreikam bhalang, kiba ju mihkhmat bha na ka bynta ki nongbylla bad kumjuh ruh ki nongdie jingdie ha madan, kata u Rev.Kyrsoi Pyrtuh bad i Kong Angela Rangad, ki lad ban mih madan ban ïakhun ïa ka elekshon MLA ha u snem 2023.
Katkum ka tyllong khubor la ïathuh ba u Rev Pyrtuh, u lah ban ïakhun na North Shillong bad i Kong Angela i lah ban ïakhhun na South Shillong.
La ïoh khubor ba kine arngut ki thmu ruh ban lum ban lang ïa ki kito kiba don kajuh ka jingmut jingpyrkhat ne kiba ïahap jingmut bad ki ban ïa ïeng lang ha kawei ka kynhun na ka bynta kane ka jingthmu jong u ha u snem 2023.
Haba phai sha ka jingtreikam jong ki, kine ki arngut kim dei shuh ki briew kiba ki paidbah kim tip ne ithuh ïa ki, hynrei kidei kiba la pawbha ha ki lad pathai khubor naduh ki snem kiba ladep, ha kaba ki la don bynta bynta ruh ka jingïakhun ban pyntreikam ïa ka RTI Act ha Meghalaya bad ka ri India ruh kumjuh. Nangta ki la ïadon bynta ruh ha ka jingïakhih ban pyntreikam ïa ka Lok Ayukta ne ban thung ïa u Lokayuk ha jylla Meghalaya.
Nangta ki la ïadon bynta ruh ha ka jingïakhun bad ka sorkar na ka bynta ki nongdie jingdie ha madan ne ha ki rud lynti ha kaba ha kine ki taïew baladep, ka sorkar jylla ka la hap ban weng noh ïa ka rai ban pyntreikam da ka aiñ jong ka sorkar jylla ha kaba ïadei bad ki nongdie jingdie ha madan, hynrei ban pyntreikam beit da ka aiñ jong ka sorkar pdeng kaba bthah ïa ki jylla ba kin ai ka jaka ba kyrpang na ka bynta ki briew ju die jingdie ha madan.
Shuh shuh,kine ki arngut ki la ïadon bynta ruh ha ka jingïakhun pyrshah ïa ka sorkar halor ka jingbym ïoh bai bylla ki nongbylla kiba ka sorkar ka la kular ban ai mar 2100 tyngka marwei namar ka jingshahkhang dam ha ka snem 2020. Lyngba ka jingleit ïakhih i Kong Angela hakhmat Secretariat shi taiew, ka sorkar ka la hap ban peit thymmai ïa ka thup jong ki paidbah nongbylla kiba la aplai lyngba ka Labour Department.
Ha shuwa jong kane, u Rev. Kyrsoi Pyrtuh, udei u Pastor jong ka KJP Synod Sepngi, uba peit ïa ka Balang Presbyterian Mawkhar. Hynrei hadien ka jingïashim bynta jong u ban pyrshah ïa ka jingpyntreikam kaba khlem shai halor u Aadhaar Number, ka la mih ka jingïatyngkhuh bad ka Synod bad poi ruh sha ïingbishar. Hadien pat, u Rev, Kyrsoi u la iehnoh ïa ka kam na ka Synod.
I Kong Angela Rangad, iba la pyndep ruh ïa ka jingpule Master na shabar ri, i la don bynta bad ki kynhun trei monsngewbha kum ka North East Network (NEN) bad kiwei kiwei. I long kawei ruh na ki longkmie kiba la ïadon bynta ha ka jingïakhun ban thung ïa ka State Commission for Women.
Ka bynta ka jingtreikam jong i ha ki bynta kiba kham hadien ka long da kaba seng ïa ka kynhun ba la tip kum ka Thma u Rangli u Juki ne ka TUR kumba ïatip baroh.
