Shillong, Jylliew 06 : Ki nongïalam jong ka Adhoc Committee jong ka Sohïong Block Congress Committee (SBCC) ki la kob ba mar ïa tip ba u Bah HDR Lyngdoh un phet noh na ka Congress bad leit ïasoh noh sha ka UDP, haduh lai ngut ki kyrtong ki la wan ban pan tiket na ka party jong ki.
“Ki don arngut lai ngut kiba wan ïa kren bad pan tiket hadien ba u Bah HDR u la mih noh na ka party hynrei ngim pat lah ban ai ka rai namar ka thong jongngi ka long ban pynskhem shwa ïa ka kynhun kaba thymmai jong ka Congress ha Sohiong,” ong u u President jong ka Sohïong primary unit, Bah B Lyngdoh haba kren bad ki lad pathai khubor.
Da kaba kyntait ba kim pat kwah ban ïathuh ïa ka kyrteng jong u kyrtong ban aireng na ka party, utei u rangbah u la ïathuh ruh ba ka daw kaba kim kwah ban pynpaw kyrteng kadei namar ki don haduh lai ngut ki kyrtong kiba pan tiket.
Ha shwa kane, u Adhoc President ka SBCC, Bah Badonbor Mawlong u la ïathuh ruh ba namar ba la pynwai noh ïa ka committee barim, kumta ki la pynbeit ba kin sa pynskhem noh da ka kynhun treikam kaba thymmai katkum ka jingbthah jong ka MPCC khnang ba kin lah pat ban pynkhreh na bynta ka elekshon MLA.
Katkum ka jingïathuh jong u, bun ki unit jong ka Congress ha Sohiong kim tip ei ei halor katei ka rai leit pynïasoh UDP jong u Bah HDR Lyngdoh bad ba haduh mynta ki dang neh beit bad ka Congress. Kumta, u la ong ba ki la pynbeit ruh ba ha ka 25tarik mynta u bnai kin pynlong ïa ka jingïalang paidbah ban jied thymmai ïa ki nongïalam jong ka Block ha shwa ba kin pyntyllun ïa ki kam shakhmat.
Na ka liang u Bah Hambert Thangkhiew u la ïathuh ba ka daw ka jingpait jingpra jong ka Congress hi kadei namar ka jingdon ki briew kiba kim sngewthuh jingmut. Kumta u la ong ba ki don ka jingkyrmen ba mynta nangne shakhmat kin lah ban trei da kawei ka jingmut ban pynkhlaiñ biang ïa ka party.
