Shillong, Jylliew 07 : Ka National People’s Party kaba ïalam mynta ïa ka bor synshar ha ka jylla ka dang hap ban ïakhun tyngeh ban ïoh sei kyrtong na baroh 60 tylli ki Constituency kiba don ha ka jylla.
Katkum ki tyllong khubor ba la ïohlum la ïathuh ba na rilum Garo baroh 24 tylli ki Constituency ka party ka la tikna ba kan sei kyrtong beitha u 2023. Hynrei haba phai pat sha rilum Khasi kaba don haduh 36 tylli ki Constituency, haduh mynta hi ka dang ïakhun ban ïoh kyrtong lut.
Ki khubor ba tikna ki ïathuh ruh ba ka party ka dang ïakhun mynta ban ïoh sei kyrtong na ki ar tylli ki constituency kiba mihkhmat da ki MLA kiba bat ruh ïa ka shuki Myntri ha ka sorkar jylla. Kitei ki kynthup ïa ka Mawkynrew Constituency ba mihkhmat da u Bah Banteidor Lyngdoh MLA jong ka PDF bad kawei pat kadei ka Shillong South ba mihkhmat da u Bah Sanbor Shullai MLA ka BJP.
Na ka liang ki heh ka NPP ki ïathuh ruh ba mynta ka jingïakren ka dang ïaid shaid shaid ban wad ïa ki kyrtong kiba bïang ban ïakhun na kitei ki ar tylli ki Constituency.
Haba ïoh ban ïakren bad ki heh ka NPP ki la ïathuh ruh ba kim kwah satia ban jied kyrtong katba ba ïoh hynrei ki kwah ba u kyrtong ba kin sei u dei ban long uba kynsai.
