Donkam ka Sorkar Pdeng ban syllok bad ka Sorkar Jylla ha ka kam thung VC ha NEHU: Dr. Ampareen

Shillong, Naiwieng 26: Ka Myntri ka sorkar jylla bad ka nongaiktien ka sorkar MDA ka Kong Ampareen Lyngdoh ha ka sngi baar ka la pynpaw ïa ka jingdonkam jong ka sorkar pdeng ban ïasyllok bad ka sorkar jylla haba ïadei bad ka kam thung ïa u vice chancellor ka North Eastern Hill University (NEHU).
Haba kren sha ki lad pathai khubor ka Kong Lyngdoh ka la ong, “Ka long kaba sngewkhia bad ïa mynta ka long kaba donkam ïa ka sorkar pdeng ban don ka jingïasyllok kaba jan bad ka sorkar jylla halor ki kam ban thung, khamtam ïa u VC. Namar lada phi ïasyllok bad shim ïa ki jingai jingmut jong ka sorkar jylla kumta phin lah ban kiar na kine ki kam ïashrut kiba la mih mynta bad phin sa lah ban pynlong ïa kane ka jaka pule kaba ïaid beit ïaid ryntih.”
Ka Myntri ka la pynpaw ruh ka jingkyrmen ba ka committee ki arngut ki dkhot (two-member committee) ba la thung da ka Ministry of Education kan sa pynmih ïa ki jingmynjur kiba khlaiñ ban pynbeit ïa kane ka jingeh bad khamtam na ka bynta ka bha ka miat ki samla pule.
“Nga thikna ba ki samla pule ki la ïaishah ïa kane ka jingbym ïaryngkat mynta la slem bha bad nga thikna ba ki samla ki la hap ban ïakynduh shaduh kane ka jingeh kaba lah ban long namar jong ka jingïaishah ha kine ki taïew, ki bnai bad ki snem ruh,” ka la ong.
“Nga kyrpad ïa baroh ki riewshemphang khamtam ïa ka kynhun kaba la leitjngoh kiba la phah da ka bor napoh ka ministry ban leit phai bad ban wanphai pat da ki rai kiba khatduh bad ka jingdonkam ruh ban kynthup lang ïa ka jylla halor ki kam ba jied ïa u VC ban pynthikna ba lada jied ïa uno ne kano ka briew ki dei ban long kiba lah biang ban wan sha ka jaka kum ka jylla Meghalaya kaba long kaba pher bha bad kaba kyrpang na kiwei pat ki jylla,” ong ka Myntri.
Ka Myntri ka la bynrap shuh shuh, “Ka long kaba kongsan na ka bynta ka sorkar pdeng ban shim ïa kane ka khubor ba ki briew jong ka jylla Meghalaya ki long kiba kyrpang ha kiba bun ki liang, khamtam ka kynhun ki samla pule.”
Haba kylli, ka myntri ka la ong ba kan bha lada ïa kane ka kam la shah ïa kiba napoh ka thaiñ ne ka jylla kiba la long kiba la tbit ban shim ïa kane ka kyrdan bad kaba khambha shuh shuh ka long ka ban wanrah jingbha ïa ki briew jong ka jylla.
“Ka Sorkar pdeng ka la buh ïa kine ki jaka pule ha kiba bun ki jylla ym dei ba kan myntoi ïalade hynrei na ka bynta ka jingmyntoi ïa ka jylla kaba ki la buh ruh ïa kane ha ka hukum. Kidei ban pyrshang bad pynbeit ïa ki jingduna kiba la mih ha ki jingshah kynnoh, ngam da ïoh ngam jylliew bha halor ki jingshisha jong kine ki jingkynnoh namar ngim don bynta halor ka kam jong ka NEHU. Ïa ka Skulbah jong ka sorkar pdeng la pynïaid da ka sorkar pdeng hynrei ka sorkar jylla ka shu peit bad naba kadei ka party ban mynjur ban buh ïa ka NEHU ha ka jylla jong ngi,” ka la ong.
Shuh shuh ka Kong Lyngdoh ka la ong, “Nga kyrmen ba ïa kane ka jingeh yn lah ban pynbeit bad shim ïa ka rai, nga kmen ba u Myntri Rangbah bad u Myntri ka tnat Pule Puthi ka jylla ki la shimkhia ïa kane ka jingeh bad baroh arngut ki la pynbor ïa ka sorkar pdeng ban shim ïa ki kam kiba donkam ban pynbeit ïa kane ka kam khamkloi katba lah bad ba ki kam ki jam hapoh kane ka skulbah yn lah ban sdang noh.”
“Ngi shaniah tylli ha kane ka university na ka bynta baroh ki kam, bad nga kyrpad ïa ka sorkar pdeng ban shim ki sienjam ban pynbeit ïa kane ka jingeh,” ka la bynrap.