Long Rangbah Shnong ki Garo ha ki shnong ka Raid Marwet, ki pynkheiñ ruh ïa ka LTA: KHNAM

Shillong, Naiwieng, 26: Ka Khun Hynniewtrep National Awakening Movement (KHNAM) ha ka sngi Baar ka la ujor sha u Deputy Chief Executive Member (Dy.CEM) uba khmih ïa ka tnat Elaka Administration jong ka Khasi Hills Autonomos District Council (KHADC) Bah Pynshngaiñ N. Syiem bad dawa ba dei ban ïaid katkum ki kyndon jong aiñ pyrshah ïa ki briew kiba dei na ka jaidbynriew Garo kiba treikam kum ki Rangbah Shnong hapoh ki shnong jong ka Raid Marwet, Hima Mlliem bad kynnoh ruh ba ki donkti ban die be-aiñ ïa ki jaka ki puta ha Ri Bhoi District sha kiwei pat ki jaidbynriew.
Ha ka jingïakren bad ki lad pathai khubor, u Working President jong ka KHNAM u Bah Thomas Passah, “ngi dawa ba dei ban pynshitom da kaba tyngeh pyrshah ïa kine ki briew kiba kam Rangbah Shnong bad ym tang katta ki don ruh ïa ki Letter Head bad ki Seal.”
U la kynnoh ba ki riewshimet na ka jaidbynriew Garo kiba treikam kum ki Rangbah Shnong ha ka shnong Maikhuli, Pillangkatta-A, ïongkhuli, Mawiong, Gambalbari, Jyrmang, Jolsyiem, Rangsakona, Chibra, Nongspung-A bad Nongspung C ka long kum ka jingpynkheiñ ïa ka aiñ, “The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act 2007.”
U Bah Passah u la ong ba katkum ka Section 2 (o) jong ka Mylliem Syiemship Act, 2007 ka la kren shai ba ka jingmut jong ka kyntien “Rangbah Shnong” ka thew ïa u khlieh nongsynshar la ka long ha ki shnong nongkyndong ne ha sor kiba hap hapoh ka jingpeit jingkhmih jong ka Hima Mylliem uba dei tang na ka jaidbynriew Khasi bad ïa uba la thung bad pynskhem katkum ki kyndon jong kane ka aiñ.
Shuh shuh u la ong, nalor ba kine ki jaidbynriew Garo ki shimkabu ban kam Rangbah Shnong ki die duh sa ïa ka khyndew ka shyiap sha kiwei pat ki jaidbynriew ki bym dei ki Khasi kaba long kum ka jingpynkheiñ sa ïa ka Section 3(1) jong ka Meghalaya Transfer of Land (Regulation) Act, 1971.
“Kum kine ki jingleh beaiñ lada ym lah ban peitngor da ka aiñ kan pyntroiñ ïa ka jingthmu ban ai jingïada hapoh ka Khyrnit Bahynriew,” ong u Bah Passah.